Taqıyatas rayonında shigit egiw jumısları shólkemleskenlik penen dawam etpekte

Taqıyatas rayonı Naymankól APJ aymaǵında jaylasqan “Sadullaev Jamshid” fermer xojalıǵında 2026-jıl ónimi ushın shigit egiw jumısları shólkemleskenlik penen alıp barılmaqta.

Usı jılı fermer xojalıǵı tárepinen 25 gektar maydanǵa paxta egiw rejelestirilgen bolıp, házirgi waqıtta egis jumısları belgilengen agrotexnikalıq múddetlerde dawam ettirilmekte.

Bul fermer xojalıǵı ótken jılı hár gektardan ortasha 45 centnerden paxta zúráátin alǵan bolsa, bıyılǵı jılǵı maqset jáne de joqarı – 55-60 centner zúráátlilikke erisiwden ibarat.

Sonday-aq, fermer xojalıǵında 10 gektar maydanǵa ǵálle egilgen. Ótken jılı ǵálleden hár gektardan 75 centner zúráát alınǵan bolsa, bıyıl 100 centner zúráát alıw rejelestirilgen.

Fermer xojalıǵınıń basshısınıń atap ótiwinshe, paxta hám ǵálleden tısqarı palız eginleri jáne kartoshka jetistiriwge de ayrıqsha itibar qaratılmaqta. Bul arqalı xalıqtı sapalı hám arzan azıq-awqat ónimleri menen támiyinlew maqset etilgen.

Búgingi kúnde fermer xojalıǵında barlıq atız jumısları zamanagóy agrotexnologiyalar tiykarında, joqarı dárejede shólkemlestirilmekte.