PQ-49-sanlı qarar orınlanıwı sheńberinde Bozatawda zıyarat ornı suw menen turaqlı támiyinlenedi

Ózbekstan Respublikası Prezidentiniń 2026-jıl 5-fevraldaǵı PQ-49-sanlı qararı tiykarında  Bozataw rayonında zıyarat turizmi ushın zárúr infrastrukturanı rawajlandırıw jumısları ámelge asırılmaqta.

Joybar sheńberinde “Kók-suw” APJ aymaǵında ornalasqan Berdaq hám Kúnxoja shayır zıyarat etiw ornın suw menen turaqlı támiyinlew maqsetinde 1 dana nasos agregatı qurılmaqta. Nasostı úzliksiz hám energiyanı únemli islewin támiyinlew ushın 20 kVt quwatlılıqqa iye quyash paneli ornatıldı.

Bul infrastruktura arqalı “KS-1” rayonlararalıq kollektorınıń suwınan nátiyjeli paydalanıw imkaniyatı jaratılıp, zıyarat ornı átirapında jasıl aymaqlardı suwǵarıw jolǵa qoyıladı. Nátiyjede aymaq abadanlastırılıp, zıyarat etiw ornınıń kórinisi jáne de jaqsılanadı.

Ámelge asırılıp atırǵan jumıslar qayta tikleniwshi energiya dereklerinen paydalanıw, suwdan únemli paydalanıw hám zıyarat turizmi ushın qolay infrastruktura jaratıwǵa qaratılǵan bolıp, Prezident qararında belgilenǵen wazıypalardıń ámeliy kórinisi esaplanadı.