Taxtakópir rayonında ǵawasha tárbiyası boyınsha atız seminarı ótkerildi Taxtakópir rayonında «Paxta jetistiriwde áhmiyetli 30 kúnlik» sheńberinde ǵawasha párwanında agrotexnikalıq ilajlardı óz waqtında hám sapalı ámelge asırıw máselelerine baǵıshlanǵan atız seminarı shólkemlestirildi. Seminarǵa «Ózaгроinspeksiya»nıń Qaraqalpaqstan Respublikası basqarması baslıǵı E.Qayıpbergenov, Qaraqalpaqstan Respublikası Ósimlikler karantini hám qorǵaw agentligi baslıǵı Dj.Xudaybergenov, Taxtakópir rayonı hákimi J.Adilov, awıl xojalıǵı tarawı qánigeleri, fermer xojalıqlarınıń basshıları hám de tiyisli shólkemlerdiń wákilleri qatnastı. Ilaj dawamında ǵawashanıń vegetaciya dáwirinde ámelge asırılıwı kerek bolǵan agrotexnikalıq ilajlar boyınsha keń túrde pikir almasıldı. Atap aytqanda, suwǵarıw, kultivaciya, azıqlandırıw, zıyankesler hám keselliklerge qarsı gúresiw, sonday-aq, ósimliklerdi biologiyalıq hám ximiyalıq qorǵaw boyınsha ámeliy usınıslar berildi hám de Awıl xojalıǵı ministrligi tárepinen usınıs etilgen «Awıl xojalıǵında hár bir fermer orınlawı shárt bolǵan 8 nızam»nıń mazmun-mánisi túsindirildi. Sonday-aq, atız sharayatında ǵawashanı párwanalaw procesinde jol qoyılıwı múmkin bolǵan kemshilikler talqılanıp, olardıń aldın alıw ilajları boyınsha usınıslar bildirildi. Qánigeler agrotexnikalıq ilajlardı belgilengen múddetlerde hám sapalı ámelge asırıw ónimdarlıqtı asırıw hám de sapalı paxta jetistiriwdiń áhmiyetli faktorı ekenin ayrıqsha atap ótti.