Nókis rayonında organikalıq pomidordı qayta islew hám eksport etiw jolǵa qoyılǵan 
Nókis rayonında jumıs alıp barıp atırǵan “BIOGUMUS” fermer xojalıǵı tárepinen quyashta keptirilgen ekologiyalıq taza, organikalıq pomidordı qayta islew jolǵa qoyılǵan.
Kárxanada pomidordan 10 túrdegi ónim islep shıǵarılıp, tayar ónimler Qıtay, Franciya, Izrail hám YAponiya sıyaqlı sırt mámleketlerge eksport etilmekte. 
Usı jılı óndirislik quwatlılıqtı arttırıw maqsetinde 15 milliard sum qarjı esabınan Qıtaydan zamanagóy ásbap-úskeneler alıp kelinip, házirgi waqıtta olardı montajlaw jumısları ámelge asırılmaqta.
Jańa úskeneler iske qosılǵannan soń, quyashta keptirilgen pomidorǵa may hám pripravalar qosıw arqalı jańa túrdegi ónimler islep shıǵarıw jolǵa qoyıladı. Nátiyjede kárxanada kúnine 5 mıń qutı ónim islep shıǵarıw imkaniyatı jaratıladı.
Bul joybardıń tolıq quwatlılıqta iske qosılıwı nátiyjesinde kárxananıń jumısı jáne de keńeyip, óndiris kólemi hám eksport potencialı artadı, jańa jumıs orınları jaratıladı.
