Tórtkúl rayonında 2027-jıl zúrááti ushın ǵálle egiw máwsimine start berildi Tórtkúl rayonında 2027-jıl zúrááti ushın gúzgi masaqlı dán eginlerin egiw máwsimine start berildi. Usı múnásibet penen Tórtkúl rayonı “Qona-Tórtkúl” APJ aymaǵındaǵı “Xudaybergen Qutlımurat” fermer xojalıǵında gúzgi ǵálle eginlerin egiw boyınsha kórgizbeli seminar shólkemlestirildi. Onda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Kamiljan Aytbaev, Ózbekstan Respublikası Awıl xojalıǵı ministrligi janındaǵı Ózagroinspekciyanıń Qaraqalpaqstan Respublikası basqarmasınıń baslıǵı E.Qaypbergenov, taraw qánigeleri, fermer hám diyxan xojalıqlarınıń basshıları qatnastı. Seminar dawamında gúzgi masaqlı dán eginlerin optimal múddetlerde egiw, tuqımlıqlardı durıs tańlaw, jerge sapalı islew beriw, egiw normalarına ámel etiw hám eginlerdi agrotexnikalıq talaplar tiykarında tárbiyalaw boyınsha ámeliy usınıslar berildi. Rayonda 2027-jıl ónimi ushın jámi 5 mıń gektar maydanǵa “Alekseevich,” “Antonina,” “ASR” hám basqa da zúráátli ǵálle sortların egiw rejelestirilgen. Seminarda ǵálle egiw máwsimin shólkemleskenlik penen shólkemlestiriw, agrotexnikalıq ilajlardı óz waqtında hám sapalı ámelge asırıw jáne joqarı zúráátlilikke erisiw boyınsha tiyisli wazıypalar belgilep alındı.