Shımbay rayonında gúzgi biyday egiw mapazına start berildi Búgin Shımbay rayonında 2027-jıl zúrááti ushın gúzgi masaqlı dán eginlerin egiw máwsimi sheńberinde “Júzbası” fermer xojalıǵında gúzgi biyday egiwge arnalǵan kórgizbeli seminar bolıp ótti. Seminar dawamında gúzgi biyday eginlerin optimal múddetlerde egiw, jerge sapalı islew beriw, tuqımnan nátiyjeli paydalanıw, egiw normalarına ámel etiw hám eginlerdi agrotexnikalıq talaplar tiykarında tárbiyalaw boyınsha ámeliy usınıslar berildi. Ilajda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Kamiljan Aytbaev, Ózbekstan Respublikası Ministrler Kabineti janındaǵı Agrosanaat kompleksi ústinen qadaǵalaw inspekciyası Qaraqalpaqstan Respublikası basqarmasınıń baslıǵı E.Qayıpbergenov, Shımbay rayonınıń hákimi N.Eshanov, awıl xojalıǵı tarawınıń qánigeleri, fermer hám diyxan xojalıqlarınıń basshıları qatnastı. Kórgizbeli seminar dawamında jaqsı niyetler menen jerge gúzgi biyday tuqımların egip, jańa ónim ushın juwapkershilikli agrotexnikalıq processke start berildi. Ilaj juwmaǵında ǵálle egiw jumısların belgilengen múddetlerde hám sapalı shólkemlestiriw, zamanagóy agrotexnologiyalardan nátiyjeli paydalanıw hám mol zúráát jetistiriw boyınsha tiyisli usınıs hám tapsırmalar berildi. 🌱 Jańa zúráát – jaqsı niyet hám sapalı agrotexnikalıq ilajlardan baslanadı!