Bozatawda puqaralardıń múrájatları tıńlandı
Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshayev Bozataw rayonında puqaralar menen ushırasıp, olardıń múrájatların tıńladı.
“Erkindárya” awıl puqaralar jıyını aymaǵındaǵı 7-sanlı mektepte ótkerilgen kóshpeli qabıllawda tek ǵana puqaralardıń múrájatları emes, al olardıń usınısları da dıqqatqa alındı.
Qabıllawǵa rayon hákimi B.Ubbiniyazov hám de awıl hám suw xojalıǵı bólimi xızmetkerleri qatnastı.
Puqaralar, tiykarınan, qıytaq jerlerge suw jetkerip beriw menen baylanıslı máselelerdi kóterdi. Suw jetip barıwı qıyın bolǵan aymaqlardı suw menen támiyinlewdi shólkemlestiriw, salmalardı tazalaw hám jańa salmalar qazıw zárúr ekenligi atap ótildi.
Sh.Teshayev puqaralardıń múrájatların dıqqat penen tıńlap, olardı sheshiw boyınsha anıq is-ilajlar belgiledi. Sonıń ishinde, rayonda hár hápte shembi hám ekshembi kúnleri tek ǵana qıytaq jerlerge suw jetkerip beriwdi shólkemlestiriw boyınsha rayon suw xojalıǵı bólimlerine tapsırmalar berildi.
