Ámiwdáryada kartoshka tuqımgershiligi rawajlanıwında jańa basqısh
Elimizde awıl xojalıǵında sapalı tuqımgershilik sistemasın rawajlandırıw, qıytaq jerlerden nátiyjeli paydalanıw hám azıq-awqat qáwipsizligin bekkemlew baǵdarında sistemalı reformalar ámelge asırılmaqta. Bul baǵdardaǵı unamlı tájiriybeler Ámiwdárya rayonında da óz nátiyjesin bermekte.
Atap aytqanda, “Xolimbeg” awılında jasawshı aldıńǵı qıytaq jer iyesi Erkinbay Xoshaev tárepinen kartoshka tuqımgershiligi baǵdarında baslanǵan baslama búgin ámeliy nátiyjeleri menen itibarǵa iye bolmaqta. Ótken jılı Awıl xojalıǵı ministrligi hám juwapker shólkemlerdiń járdeminde 300 kilogramm “Tashkent” sortlı kartoshka tuqımı egilip, 10 sotıx maydannan 4 tonnaǵa shekem ónim alındı. Bul joqarı nátiyje rayonda tuqımgershilikti rawajlandırıw boyınsha áhmiyetli tájiriybe sıpatında bahalandı.
Áne usı tabıslı tájiriybe tiykarında Erkinbay Xoshayev usı jılı kartoshka tuqımgershiligi maydanların jáne de keńeytip, 70 sotix jer maydanına usı sorttı ekti. Bunnan tısqarı, kartoshka tuqımın kóbeytiw hám aymaqta tuqımgershilik bazasın qáliplestiriw maqsetinde awıldaǵı qıytaq jer iyelerine de egiw ushın tuqımlar tarqatıldı. Bul bolsa xalıqtıń qıytaq jerlerinde nátiyjeli diyxanshılıqtı rawajlandırıw, joqarı ónimdarlıqqa erisiw hám dáramat dáreklerin kóbeytiwde áhmiyetli faktor bolmaqta.
Erkinbay Xoshayevtıń jumısı tek ǵana kartoshka jetistiriw menen sheklenip qalıp atırǵan joq. Ol óziniń qıytaq jerinde aymaqtıń klimat sharayatında siyrek ushırasatuǵın qurma tereklerin tárbiyalap, olardan ónim almaqta. Sonday-aq, 1 sotıx maydanda limonariya shólkemlestirip, citrus ónimlerin jetistiriwdi jolǵa qoyǵan. Qosımsha túrde ıssıxana shólkemlestirilip, onda qıyar jetistiriw jumısları da alıp barılmaqta.
Bul kóp tarmaqlı qıytaq jer jetistiriw tájiriybesi jer maydanlarınan aqılǵa uǵras paydalanıw, diversifikaciyanı keńeytiw hám qıytaq jer xojalıqlarınıń ekonomikalıq nátiyjeliligin arttırıwda úlgili tájiriybe bolıp xızmet etpekte.
Búgingi kúnde Ámiwdárya rayonı hákimligi, rayonlıq awıl xojalıǵı bólimi hám qánige agronomlar menen birgelikte bul tájiriybeni ǵalaba en jaydırıw, kartoshka tuqımgershiligi sistemasın ilimiy qatnas tiykarında rawajlandırıw, agrotexnikalıq ilajlar hám oqıw-seminarlar shólkemlestiriw arqalı tarawda jańa jetiskenliklerge erisiw maqset etilgen.
Ámiwdáryada jolǵa qoyılıp atırǵan bunday aldıńǵı baslamalar tek ǵana qıytaq jerdi rawajlandırıwǵa emes, al aymaqta azıq-awqat qáwipsizligin támiyinlew hám xalıqtıń abadanlıǵın arttırıwǵa xızmet etpekte.
