Nókis qalasında sharwashılıq hám qusshılıq baǵdarındaǵı fermer hám isbilermenler menen ushırasıw ótkerildi
Qaraqalpaqstan Respublikası Nókis qalasındaǵı Ózbekstan Sawda-sanaat palatasınıń Qaraqalpaqstan Respublikası basqarması májlisler zalında sharwashılıq hám qusshılıq baǵdarında iskerlik júritip atırǵan fermer hám isbilermenler menen ushırasıw bolıp ótti.
Bul ushırasıw Ózbekstan Respublikası awıl xojalıǵı ministriniń orınbasarı – Sharwashılıq hám jaylaw xojalıǵın rawajlandırıw agentligi direktorı Orif Butaev hám Qaraqalpaqstan Respublikası Joqarǵı Keńesi komitetiniń baslıǵı A. Jumanazarov basshılıǵında shólkemlestirildi.
Ilaj dawamında mámleketimizde sharwashılıq tarawın rawajlandırıw, jaylawlardan nátiyjeli paydalanıw hám azıq-awqat qáwipsizligin bekkemlew boyınsha ámelge asırılıp atırǵan reformalar haqqında tolıq maǵlıwmat berildi.
Atap ótilgenindey, Ózbekstan Respublikası Awıl xojalıǵı ministrligi janında Sharwashılıq hám jaylaw xojalıǵın rawajlandırıw agentligi dúzilgen bolıp, agentlik aldına bir qatar áhmiyetli wazıypalar belgilep berilgen.
- Atap aytqanda, jańa agentlik tárepinen:
- qaramallar sanın 16,5 million basqa;
qoy hám eshkiler sanın 30 million basqa;
parrandalar sanın 141 million basqa jetkeriw;
gósh hám sút ónimlerin qayta islew dárejesin 50 payızǵa arttırıw;
násilli qaramallar úlesin 90 payızǵa jetkeriw;
jem-shóp egislik maydanların 1,5 esege keńeytiw rejelestirilgen.
Sonday-aq, azıq-awqat bazasın bekkemlew hám násilshilik jumısların bunnan bılay da jaqsılaw maqsetinde Qaraqalpaqstan Respublikası hámde hár bir wálayattan bir rayon sharwashılıqqa qánigelestiriletuǵını málim etildi.
Bul aymaqlarda paxta hám ǵálle maydanlarınıń 50 payız bóleginde jem-shóp eginlerin egiwge ruqsat beriliwi hámde usı baǵdardaǵı joybarlar ushın 10 payızlıq jeńillikli kreditler ajıratılıwı belgilengen.
Bunnan tısqarı, endigiden bılay barlıq fermer xojalıqlarına ijara jer maydanlarınıń 20 sotix bóleginde artıqsha byurokratiyalıq tosıqlarsız jeńil konstrukciyalı imaratlar, jem-shóp qoymaları hámde silos oraların qurıwǵa ruqsat beriletuǵınlıǵı atap ótildi.
Jıynalısta jıl aqırına shekem respublika boyınsha keminde 10 gektar jer maydanına iye bolǵan 28 mıń 746 fermer xojalıǵında ulıwma 2 million bas qaramal baǵıwdı shólkemlestiriw rejelestirilip atırǵanı ayrıqsha atap ótildi.
Ushırasıw dawamında fermer hám isbilermenlerdiń múrájat hám usınısları tıńlanıp, tarawda bar bolǵan mashqalalardı sheshiw, sharwashılıq iskerligin bunnan bılay da rawajlandırıw boyınsha óz-ara pikir alısıldı.
Ilaj sońında tarawdı qollap-quwatlaw, óndiris kólemin arttırıw hám zamanagóy sharwashılıq sistemasın rawajlandırıw boyınsha ámelge asırılatuǵın wazıypalar júzesinen tiyisli usınıslar berildi.
