Tákirarıy eginlerden mol ónim alıw jolında Ámiwdárya rayonı ǵállekeshleri bıyıl da kontraktatsiya shártnamaların artıǵı menen orınlap, hár bir qarıs jerden ónimli paydalanıw maqsetinde ǵálleden bosaǵan maydanlarǵa ovosh, palız, másh hám sharwa malları ushın ot-jem sıyaqlı tákirarıy eginler ekti. Atap aytqanda, rayonnıń Dórman awılı aymaǵındaǵı fermer xojalıqları 229 gektar hám Xolimbeg awılındaǵı xojalıqlar 194 gektar ǵálleden bosaǵan jerge tákirarıy eginler ekti. Bul processte fermerler keńesiniń juwapkerli xızmetkerleri diyxanlarǵa jaqınnan kómeklesip, dáramattı arttırıw boyınsha zárúr usınıslar menen támiyinlemekte. Bul usıl jerden jıl dawamında eki márte ónim alıw, topıraq ónimdarlıǵın asırıw hám azıq-awqat qáwipsizligin bekkemlew imkaniyatın beredi. Usı kúnlerde qánigeler tárepinen eginlerdiń jaǵdayı turaqlı qadaǵalawǵa alınıp, zıyankeslerge qarsı óz waqtında ximiyalıq hám biologiyalıq islewler alıp barılmaqta. Diyxanlarımızdıń búgingi mashaqatlı miyneti, jerge berilip atırǵan miyrim hám durıs qollanılıp atırǵan agrotexnikalıq ilajlar gúzge barıp elimiz bazarlarında molshılıqtı támiyinleydi hám ekonomikamızdıń jáne de rawajlanıwına xızmet etedi.