Tájiriybeli fermer — jemisli miynet úlgisi Ámiwdárya rayonında fermerlik iskerligin turaqlı rawajlandırıp, awıl xojalıǵı ónimlerin jetistiriwde joqarı nátiyjelerge erisip kiyatırǵan fermerlerden biri — “Dosımbetova Qizlargúl” fermer xojalıǵınıń baslıǵı Qızlargúl Dosımbetova. Fermer xojalıǵınıń ulıwma jer maydanı 60,3 gektar bolıp, sonnan 35 gektarına paxta, 19,3 gektarına basqa awıl xojalıǵı eginleri egiledi. 2021–2025-jıllarda paxta zúráátliligi 36–40 sentnerdi qurap, shama menen 700 tonna sapalı paxta jetistirilgen hám shártnamalıq rejeler 150–170 payız dárejesinde orınlanǵan. Ǵálleshilik baǵdarında da turaqlı kórsetkishlerge erisilip, 11 gektar maydannan zúráátlilik 57 sentnerden 60 sentnerge shekem asırılǵan. Mámleketke 60 tonnadan artıq biyday tapsırılıp, reje 200 payızǵa orınlanǵan. Xojalıqta jerlerdiń meliorativlik jaǵdayın jaqsılawǵa da ayrıqsha itibar qaratılıp, hár jılı 20–25 mln som qarjı irrigaciya hám melioraciya jumıslarına baǵdarlanadı. Uzınlıǵı 2,5 kilometr bolǵan “Nazarxan-arna” kanalı hám 1,7 kilometrlik kollektor turaqlı túrde tazalanıp, qazılıp turadı. Fermer xojalıǵınıń materiallıq-texnikalıq bazası zárúr awıl xojalıǵı texnikaları menen támiyinlengen. Olardan nátiyjeli paydalanıw nátiyjesinde sońǵı úsh jılda 40 mln somnan artıq qarjı únemlengen. Xojalıqta 25 puqara turaqlı jumıs penen támiyinlengen. Sonıń menen birge, 0,10 gektar maydanda balıqshılıq háwizi shólkemlestirilip,  quslar sanı 400 basqa jetkerilgen. Aymaqtı abadanlastırıw hám kókelemzarlastırıw maqsetinde usı jılı 1000 túp sayalı, 300 túpten artıq miyweli hám de 2000 túpten aslam terek hám tut nálleri egilgen. Qızlargúl Dosımbetovanıń jemisli miyneti múnásip bahalanıp, 2020-jılı “Awıl xojalıǵı pidayısı”, 2022-jılı bolsa “Aldıńǵı fermer” kókirek nıshanları menen sıylıqlanǵan. Búgingi kúnde de fermer xojalıǵında jer hám suw resurslarınan nátiyjeli paydalanıw, joqarı zúráátlilikke erisiw hám de awıl xojalıǵı ónimlerin jetistiriwdi kóbeytiw boyınsha jumıslar turaqlı dawam ettirilmekte.