Qaraqalpaqstan Respublikası Awıl xojalıǵı ministrligi hám Tórtkúl rayonı hákimliginiń málimleme xızmetleri menen birgelikte “Paxta zúráátin qabıllaw, saqlaw hám qayta islew sistemasındaǵı zamanagóy kózqaraslar” atamasında media-tur shólkemlestirildi. Onda ǵalaba xabar qurallarınıń wákilleri hám jurnalistler qatnasıp, paxta shiyki zatın zamanagóy texnologiyalar tiykarında jıynap alıw, qabıl etiw hám saqlaw processleri menen jaqınnan tanıstı. Media-turdıń dáslepki mánzili “Paxtachi Nazarbek” fermer xojalıǵı bolıp, dáslep qatnasıwshılar rayondaǵı “Paxtachi” awıl puqaralar jıyını aymaǵında jaylasqan fermer xojalıǵına bardı. Bul jerde zamanagóy paxta teriw mashinası járdeminde ámelge asırılıp atırǵan processler kórsetildi. Xojalıqqa jámi 90 gektar jer maydanı tuwra kelip, sonnan 40 gektarına shigit egilgen. Házirgi waqıtta atızlarda ónim jıyın-terimi qızǵın hám shólkemleskenlik penen dawam etpekte. Fermer xojalıǵınıń basshısı Arazmammat Allabaev usı jılı hár gektardan 63-65 centnerden mol zúráát alıwdı rejelestirgen. Bunıń ushın jawın-shashınlı kúnlerge qaldırmay, qısqa waqıtlarda jıynap alıw ushın jumıslar jedel alıp barılmaqta. Zamanagóy texnikalar hám aldınǵı kózqaraslardıń qollanılıwı tek ǵana miynetti jeńillestirip qoymastan, al qırmannıń zúráátli bolıwın da támiyinlemekte. Media-turdıń dawamı hám basqa da jańalıqlardı kanalımızda baqlap barıń!