“Sharwashılıq tarmaqların rawajlandırıw keleshegi, erisken tabıslar hám áhmiyetli máselelerdiń sheshimleri” temasında seminar ótkerildi

Búgingi kúnde sharwashılıq tarmaǵın tez pátler menen rawajlandırıw, xalqımızdı arzan hám sapalı gósht, sút hám basqa da azıq-awqat ónimleri menen támiyinlew, ásirese, awıl jerlerde jasaytuǵın puqaralardıń jumıs penen támiyinleniwin hám dáramatların kóbeytiw imkaniyatları jaratılmaqta.

Prezidentimiz Shavkat Mirziyoyevtiń 2025-jıl 30-yanvardaǵı “Jaylawlardı qorǵaw hám olardan aqılǵa muwapıq paydalanıwdıń zamanagóy mexanizmlerın engiziw is-ilajları haqqında”ǵı PP-15-sanlı pármanı jáne “Sharwashılıq hám qusshılıqtı qollap-quwatlaw, tarawda joqarı qosımsha qun jaratıw boyınsha qosımsha is-ilajlar haqqında”ǵı PQ-34-sanlı qararı bul baǵdarda áhmiyetli qádemler bolıp esaplanadı.

Usı jıldıń 15-may kúni PP-15-sanlı párman hám PQ-34-sanlı qararda belgilengen wazıypalardıń orınlanıwı boyınsha Qaraqalpaqstan Respublikası Sawda-sanaat palatası májilisler zalında seminar ótkerildi.

Seminarǵa Ózbekstan Respublikası Veterinariya hám sharwashılıqtı rawajlandırıw komiteti baslıǵınıń sharwashılıq hám jaylaw xojalıǵın rawajlandırıw máseleleri boyınsha orınbasarı F.Boboyev, Qaraqalpaqstan Respublikası Awıl xojalıǵı ministriniń birinshi orınbasarı A.Koziev, Qaraqalpaqstan Respublikası Veterinariya hám sharwashılıqtı rawajlandırıw komiteti baslıǵınıń birinshi orınbasarı K.Pirnazarov, Sawda-sanaat palatası Qaraqalpaqstan Respublikası basqarması baslıǵınıń orınbasarı A.Seytaxov, kommerciyalıq bank basshıları, veterinariya hám sharwashılıqtı rawajlandırıw bólimi baslıqları hám sharwa fermerleri qatnastı.

Seminar dawamında sharwashılıq tarawın rawajlandırıw boyınsha ámeliy máseleler, jaylawlardı qorǵaw hám olardan aqılǵa muwapıq paydalanıw, sharwashılıqta zamanagóy texnologiyalardı engiziw, veterinariya xızmetlerin jetilistiriw sıyaqlı áhmiyetli temalar dodalandı.

Bul seminar sharwashılıq tarawında ámelge asırılıp atırǵan reformalardı jáne de tezlestiriw, tarawdıń rawajlanıwına xızmet etetuǵın jańa ideyalar menen baslamalardı alǵa súriwge túrtki beredi.