Aldın xabar bergenimizdey, deputatlar Qaraqalpaqstanda Prezidentimiz qararlarınıń orınlanıwın úyreniwdi dawam ettirmekte
Ózbekstan Respublikası Prezidentiniń basshılıǵında 2025-jıl 16-iyunde ótkerilgen videoselektor májilisinen kelip shıǵıp, Oliy Majlis Nızamshılıq palatası Qaraqalpaqstan Respublikasın sociallıq-ekonomikalıq rawajlandırıw boyınsha qabıl etilgen nızam astı hújjetleriniń orınlanıw jaǵdayı ústinen parlamentlik qadaǵalawdı kúsheytiw maqsetinde aymaqta qadaǵalaw, analiz tártibinde úyreniwler alıp barmaqta.
Deputatlar Z.Zohidov hám R.Siddiqovlar óz jumısların dawam ettirip, búgin, 8-avgust kúni Qaraqalpaqstan Respublikasınıń Qońırat rayonında bolıp, Prezidentimizdiń sharwashılıqtı rawajlandırıw hám suw resurslarınan nátiyjeli paydalanıwǵa qaratılǵan qararlarınıń orınlanıwı ústinen parlamentlik qadaǵalawdı ámelge asırdı.
Kún tártibine muwapıq, deputatlar dáslep Qońırat rayonı hákimligi imaratında taraw wákilleri menen ushırastı. Ushırasıwda aymaqtı sociallıq-ekonomikalıq rawajlandırıw máseleleri dodalandı.
Bunnan soń, deputatlar Qońırat rayonı orayınan ótiwshi “Jińishke” kanalınıń betonlaw jumısları menen tanıstı hám taraw wákilleriniń usınısların tıńladı. Kanaldıń betonlanıwı suw resurslarınan nátiyjeli paydalanıw hám suw shıǵınların azaytıwǵa xızmet etedi.
Keyingi mánzil rayondaǵı Miynetabat awıl puqaralar jıyını aymaǵında jaylasqan “Erbol sharwa” fermer xojalıǵı boldı. Deputatlar fermer xojalıǵınıń jumısı menen tanısıp, mashqalaların úyrendi. Maǵlıwmatlarǵa bola, fermer xojalıǵınıń 190 gektar jer maydanı bolıp, 280 bas qaramal bar.
Kún juwmaǵında deputatlar hám taraw wákilleri rayondaǵı Ádebiyat máhállesi aymaǵında jaylasqan “Portau tartuli” fermer xojalıǵınıń tamshılatıp suwǵarıw texnologiyaları tiykarında egilgen ǵawasha (paxta) atızlarınıń jumısı menen tanıstı hám usınıslar hám mashqalalardı tıńladı. Tamshılatıp suwǵarıw texnologiyası suwdı únemlew hám ónimdarlıqtı arttırıw imkaniyatın beredi.
Bul úyreniwlerdiń tiykarǵı maqseti – Prezident qararlarınıń orınlanıwın támiyinlew, aymaqlarda sharwashılıqtı rawajlandırıw, suw resurslarınan aqılǵa muwapıq paydalanıw hám jerlerdiń meliorativlik jaǵdayın jaqsılaw boyınsha ámelge asırılıp atırǵan jumıslardı baqlap barıw jáne bar mashqalalardı anıqlaw hám olardı saplastırıw ilajların kóriwden ibarat.
