Fermer hám klaster wákilleriniń mashqalaları tıńlanıp, jerde sheshiliwi támiyinlendi.

Qaraqalpaqstan Respublikasında Awıl xojalıǵı ministri Ibrohim Abdurahmonov hám Ministrler Keńesi Baslıǵınıń orınbasarı Sh.Teshaevtıń basshılıǵında qubla rayonlardıń agrar tarawdaǵı mashqalaların sheshiwge baǵıshlanǵan jıynalıs bolıp ótti.

Jıynalısta vertikal basqarıw sistemasın nátiyjeli jolǵa qoyıw, ashıq-aydınlıqtı támiyinlew, agrotexnikalıq usınıslar hám shólkemlestiriw jumısların muwapıqlastırıw máseleleri talqılandı. Ministr fermerler menen turaqlı baylanıstı jolǵa qoyıw, olardıń mashqalaların sheshiw, agroxızmetler sapasın hám suwdan paydalanıw nátiyjeliligin arttırıw áhmiyetli ekenligin atap ótti.

Is-ilaj sheńberinde shólkemlestirilgen kóshpeli qabıllawda fermer hám klaster wákilleriniń mashqalaları tıńlandı hám sol jerdiń ózinde sheshildi. Jer ajıratıw, suwǵarıw, subsidiyalar, kreditler hám huqıqıy máseleler boyınsha múrájatlar qarap shıǵıldı.

Bul jıynalıs hám kóshpeli qabıllaw awıl xojalıǵında basqarıw sistemasın zamanagóylestiriw, ashıq baylanıstı jolǵa qoyıw hám mashqalalardı ornında sheshiw baǵdarında úlken áhmietke ie boldı.