#press_tur

Qaraqalpaqstan Respublikası Ósimlikler karantini hám qorǵaw agentligi tárepinen awıl xojalıǵı ónimlerin eksportqa tayarlaw, olardı xalıqaralıq fitosanitariyalıq talaplar tiykarında qadaǵalawdan ótkeriw hám eksportshılar ushın jaratılıp atırǵan sharayatlar menen jámiyetshilikti tanıstırıw maqsetinde press-tur shólkemlestirildi.

Ilajda jurnalistler, blogerler hám taraw wákilleri qatnasıp, Nókis qalasındaǵı sırtqı ekonomikalıq baylanıs bajıxana postında karantin astındaǵı ónimlerdiń fitosanitariyalıq kórigi, laboratoriyalıq tekseriwler hám sertifikatlaw processleri, sonday-aq, “E-Fito” elektron sisteması arqalı xızmet kórsetiw procesi menen de tanıstı.

Bunnan soń qatnasıwshılar “Nókis qalalıq sawda kompleksi” hám “Xojeli agrologistika orayı”nda bolıp, eksportqa mólsherlengen ónimlerdi saqlaw hám monitoring islew processlerin kózden keshirdi.

Usı jıldıń basınan baslap agentlik tárepinen 1 691 xalıqaralıq hám 5 563 ishki fitosanitariyalıq sertifikat rásmiylestirilgen. Ósimlikler karantini qadaǵalawı astındaǵı ónimlerdiń eksportı 44,4 mıń tonnanı, al importı 65,6 mıń tonnadan aslamdı quradı.

Tiykarǵı eksport baǵdarların Rossiya, Awǵanstan, Italiya, Túrkiya, Qıtay hám Koreya Respublikası quraydı. Eksport quramınıń tiykarǵı bólegin boyan tamır, un ónimleri, soblıqlı, maylı ósimlikler hám miywe-palız ónimleri quraydı. Agentlik sistemasında “E-Fito” hám “Agroko’makchi” platformaları arqalı sanlastırıw hám ashıq-aydınlıqtı támiyinlew arqalı fitosanitariyalıq qáwipsizlikti támiyinlew jumısları izbe-iz dawam ettirilmekte.