Pal hárreshilik dáramatlı taraw

Qaraqalpaqstan Respublikası Agroxızmetler orayı Beruniy rayonlıq bólimi tárepinen pal hárreshilikti rawajlandırıw hám bul baǵdarda alıp barılıp atırǵan jumıslardıń jaǵdayı boyınsha seminar bolıp ótti. Pal hárreshilik dáramatlı tarawlardan biri. Tábiyattıń insanǵa bergen jáne bir ullı ne’meti esaplanadı. Pal hárresin baǵıw, pal alıwdan keletuǵın dáramat shańaraqtıń abadanlıǵına xızmet etedi.

Húrmetli Prezidentimizdiń awıl xojalıǵında hár bir fermer xojalıǵı atız shetlerinde 5 ewden pal hárre qutıların jaylastırıw, kámbaǵal shańaraqlardı pal hárresin baǵıw arqalı dáramatlı etiw boyınsha qararlarında sáwleleniwi bul tarawdıń jáne de rawajlanıwın kórsetedi.

Búgingi ótkerilgen seminar dawamında pal hárresin baǵıw, tárbiyalaw, hár qıylı keselliklerden saqlaw, shanshıw hám qıslawdan shıǵarıw boyınsha qánigeler tárepinen usınıslar berildi. Tınıshlıq awıl puqaralar jıyını aymaǵında pal hárreshilik penen shuǵıllanıp atırǵan Polat Ametov bul baǵdarda kóp jıllıq tájiriybege ie hám óz bilimlerin tarawǵa jańadan kirip kelgen shákirtlerine úyretip, ustazlıq etip kelmekte. Maǵlıwmat ushın Beruniy rayonında 5 pal hárreshilik fermer xojalıqları bar.