Awıl xojalıǵı hám sharwashılıq tarawında zamanagóy agrotexnologiyalardı qollanıw boyınsha oqıw-seminar bolıp ótti.
Ózbekstan Respublikası Prezidentiniń 2025-jıl 3-noyabrdegi PQ-334-sanlı qararınıń orınlanıwın támiyinlew maqsetinde 20-21-yanvar kúnleri Qaraqalpaqstan awıl xojalıǵı hám agrotexnologiyalar institutınıń úlken májilisler zalında “Awıl xojalıǵı hám sharwashılıq tarawında zamanagóy agrotexnologiyalardı qollanıw, veterinariya xızmetlerinen paydalanıwdıń áhmieti hám ekonomikalıq nátiyjesi” atamasında fermer xojalıqları basshıları hám qánigeleri ushın oqıw-seminarı shólkemlestirildi.
Bul oqıw-seminar fermer xojalıqlarınıń bilim hám kónlikpelerin arttırıw, awıl xojalıǵı óndirisine aldınǵı agrotexnologiyalardı keńnen engiziw, sharwashılıqta veterinariya xızmetlerinen nátiyjeli paydalanıw hám óndiris nátiyjeliligin arttırıwǵa qaratıldı.
Seminardıń birinshi kúni – 2026-jıl 20-yanvar kúni Taqıyatas, Xojeli, Shomanay, Qanlıkól, Qońırat, Moynaq, Kegeyli, Bozataw, Shımbay, Qaraózek, Taxtakópir hám Nókis rayonlarındaǵı fermer xojalıqlarınıń wákilleri qatnastı. Ekinshi kúni – 21-yanvar kúni bolsa Tórtkúl, Beruniy, Ellikqala hám Ámiwdárya rayonları fermer xojalıqları ushın seminar sabaqları ótkerildi.
Oqıw-seminar Qaraqalpaqstan Respublikası Joqarǵı Keńesi komitetiniń baslıǵı Anvar Jumanazarovtıń basshılıǵında bolıp ótti. Ilaj Qaraqalpaqstan Respublikası rayon hákimleriniń awıl hám suw xojalıǵı máseleleri boyınsha orınbasarları basshılıǵında shólkemlestirildi.
Seminar dawamında qatnasıwshılarǵa awıl xojalıǵı eginlerin jetistiriwde zamanagóy agrotexnologiyalar, resurslardı únemleytuǵın suwǵarıw usılları, sharwashılıqta nátiyjeli basqarıw, veterinariya xızmetlerinen paydalanıwdıń ekonomikalıq áhmieti, keselliklerdiń aldın alıw hám ónimdarlıqtı arttırıw máseleleri boyınsha tolıq túsinikler berildi.
Sonday-aq, taraw qánigeleri tárepinen ámeliy usınıslar berilip, fermerlerdi qızıqtırǵan sorawlarǵa hár tárepleme juwaplar qaytarıldı. Seminar juwmaǵında aldıńǵı tájiriybelerdi ámeliyatqa engiziw arqalı awıl xojalıǵı ónimleriniń kólemi hám sapası artatuǵını, fermer xojalıqlarınıń ekonomikalıq turaqlılıǵı bekkemlenetuǵını atap ótildi.
Bul oqıw-seminar Prezident qararında belgilengen wazıypalardıń orınlanıwın támiyinlew, awıl xojalıǵı hám sharwashılıq tarawında sistemalı reformalardı tereńlestiriw jáne fermer xojalıqlarınıń básekige shıdamlılıǵın arttırıwda ayrıqsha áhmietke iye.
