Qaraqalpaqstan Respublikasında 2026-jıl ónimi ushın paxta máwsimin nátiyjeli shólkemlestiriw maqsetinde sistemalı jumıslar izbe-iz dawam ettirilmekte. Usı process barısında Ámiwdárya rayonınıń «Aq altın» awıl puqaralar jıyını aymaǵındaǵı «Saparbayev Qadir» fermer xojalıǵında respublikalıq kólemdegi ámeliy seminar shólkemlestirildi. Bul ilaj shigit egiw processlerin aldıńǵı agrotexnologiyalar tiykarında jolǵa qoyıw, bar resurslardan aqılǵa muwapıq paydalanıw hám ónimdarlıqtı asırıw máselelerine baǵıshlandı.
Seminarǵa Qaraqalpaqstan Respublikası Ministrler Keńesiniń Baslıǵı Farxad Ermanov, Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Kamiljon Aytbaev, sonday-aq, barlıq rayon hákimleri, tiyisli mákeme hám shólkemlerdiń basshıları, taraw qánigeleri hám de fermer xojalıqlarınıń wákilleri qatnastı. Ilaj sheńberinde aymaqlarda ámelge asırılıp atırǵan agrotexnikalıq ilajlardıń barısı hár tárepleme analizlenip, anıqlanǵan mashqalalar hám olardıń sheshimleri boyınsha anıq wazıypalar belgilep alındı.
Ámeliy seminar dawamında qánigeler tárepinen jerlerdi egiwge sapalı tayarlaw, shigitti agroiqlimlıq shárayatlardan kelip shıǵıp optimal múddetlerde egiw, zamanagóy texnika hám innovaciyalıq texnologiyalardı keńnen engiziw, suw resurslarınan nátiyjeli paydalanıw boyınsha tolıq usınıslar berildi. Hár bir agrotexnikalıq processte qatań tártip-intizam hám belgilengen texnologiyalıq talaplardıń sózsiz orınlanıwı joqarı ónimdarlıqqa erisiwdiń sheshiwshi faktorı sıpatında ayrıqsha atap ótildi.
Seminar sheńberinde shólkemlestirilgen atız kórgizbeleri qatnasıwshılarǵa teoriyalıq bilimlerdi ámeliyat penen uyǵınlastırıw imkaniyatın berdi. Atap aytqanda, shigit egiw texnologiyası, egiw agregatlarınıń sazlıǵı, olardı nátiyjeli basqarıw hám optimal jumıs rejimlerin támiyinlew processleri tikkeley atızda kórsetildi. Bul bolsa fermerler hám qánigeler ushın aldıńǵı tájiriybelerdi ózlestiriwde úlken áhmiyetke iye boldı.
Maǵlıwmatlarǵa qaraǵanda, Ámiwdárya rayonı awıl xojalıǵı potencialı joqarı bolǵan aymaqlardıń biri esaplanadı. Rayonnıń ulıwma jer maydanı 102 mıń gektardan aslam bolıp, sonnan 33 mıń 648 gektarı suwǵarılatuǵın awıl xojalıǵı jerleri bolıp tabıladı. Házirgi waqıtta rayonda 631 fermer hám awıl xojalıǵı kárxanaları iskerlik júrgizip, olar tárepinen 30 mıń gektardan aslam maydanda eginler ósirilmekte.
2026-jıl ónimi ushın rayonda jámi 31 mıń 274 gektar maydanǵa awıl xojalıǵı eginlerin jaylastırıw rejelestirilgen bolıp, sonnan 13 mıń gektarı paxta maydanlarına tuwra keledi. Bul bolsa paxtashılıqtıń rayon ekonomikasındaǵı strategiyalıq áhmiyetin jáne bir márte tastıyıqlaydı.
Paxtashılıq baǵdarında rayonda 335 fermer xojalıǵı hám de «Eko teks» JShJ klasteri iskerlik júrgizbekte. Egislik maydanlarında «Sultan», «Ravnaq-2» sıyaqlı jergilikli hám shet el sortların keńnen engiziw, sonday-aq, jeke hám qos qatarlı egiw sistemaların qollanıw arqalı ónimdarlıqtı asırıwǵa ayrıqsha itibar qaratılmaqta.
Qaraqalpaqstan Respublikası boyınsha usı jılı 80 mıń gektar maydanǵa shigit egiw rejelestirilgen. Búgingi kúnde respublika aymaqlarında jámi 4 813 fermer xojalıǵı iskerlik júrgizip, olar hár túrli baǵdarlarda nátiyjeli islep kelmekte.
Qánigelerdiń boljawlarına qaraǵanda, belgilengen agrotexnikalıq ilajlardıń óz waqtında hám sapalı ámelge asırılıwı nátiyjesinde ortasha ónimdarlıq 50–60 centnerden joqarı bolıwı, ulıwma ónim kólemi bolsa sezilerli dárejede artıwı kútilmekte. Bul bolsa respublika paxtashılıq tarawınıń turaqlı rawajlanıwına xızmet etedi.https.
Seminar sońında juwapkerlerge shigit egiw jumısların belgilengen agrotexnikalıq múddetlerde — mart ayınıń aqırınan aprel ayınıń basına shekem joqarı sapada shólkemlestiriw, hár bir gektardan maksimal ónim alıw ushın barlıq resurslardı jumsaqqa keltiriw hám de processler ústinen qatań qadaǵalaw ornatıw boyınsha anıq tapsırmalar berildi.
Atap ótiw kerek, bunday ámeliy qatnaslar hám sistemalı ilajlar awıl xojalıǵında nátiyjelilikti asırıw, jer hám suw resurslarınan aqılǵa muwapıq paydalanıw hám de joqarı nátiyjelerge erisiwde áhmiyetli faktor bolıp xızmet etedi. Jerge itibar hám ilimiy tiykarlanǵan qatnas bolsa mol ónimniń eń áhmiyetli kepili bolıp tabıladı.
