Taqıyatas rayonında paxta tàrbiyasına baǵıshlanǵan atız seminarı ótkerildi
Taqıyatas rayonınıń «Nayman» APJ aymaǵındaǵı «Nayman Agro Green House» fermer xojalıǵında paxta parwarıshınıń búgingi basqıshında ámelge asırılıwı kerek bolǵan agrotexnikalıq ilajlarǵa baǵıshlanǵan atız seminarı shólkemlestirildi.
Seminarǵa Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, awıl xojalıǵı ministri Kamiljan Aytbaev, Respublikadan biriktirilgen wákil Abror Raximjonov, Ósimlikler karantini hám qorǵaw agentligi wákilleri, awıl xojalıǵı tarawı qánigeleri, fermer xojalıqlarınıń basshıları hám de juwapkerli shólkemlerdiń wákilleri qatnastı.
Atız seminarında paxtanıń vegetaciya dáwirinde joqarı ónimdarlıqtı támiyinlew ushın áhmiyetli bolǵan agrotexnikalıq ilajlardı óz waqtında hám sapalı orınlaw máseleleri ámeliy tárizde kórip shıǵıldı. Qatnasıwshılarǵa suwǵarıwdı durıs shólkemlestiriw, mineral tóginler menen azıqlandırıw, qatar aralarına islew beriw, suspenziya seppew, defoliaciya máwsimine puqta tayarlıq kóriw, zıyanlı shıbın-shirkeyler hám keselliklerge qarsı nátiyjeli gúresiw boyınsha usınıslar berildi.
Sonday-aq, atız shetlerinen nátiyjeli paydalanıw, qosımsha dáramat dereklerin jaratıw hám bar bolǵan jer maydanlarınan ónimli paydalanıw máselelerine de ayrıqsha itibar qaratıldı.
