• Suwıtqıshlı sıyımlılıqlar – ónimdi jıl dawamında sapalı jetkerip beriw imkaniyatı
      • Ámiwdárya rayonı “Tasjap” APJ aymaǵında jumıs alıp barıp atırǵan Sherzot Bekmanovtıń diyxan xojalıǵı tárepinen miywe-ovosh ónimlerin sapalı saqlaw hám xalıqtı jıl dawamında hár qıylı ónimler menen támiyinlewge ayrıqsha itibar qaratılmaqta. Xojalıq qaramaǵındaǵı 4 gektar baǵda jetistirilip atırǵan miywe ónimlerin uzaq múddet sapasın saqlaǵan halda bazarǵa shıǵarıw maqsetinde bunnan eki jıl aldın ulıwma sıyımlılıǵı 150 tonna bolǵan eki suwıtqıshlı qoymaxana – 100 tonnalıq hám 50 tonnalıq sıyımlılıqlar qurılǵan. Házirgi waqıtta bul suwıtqıshlı qoymaxanalarǵa xojalıqtıń óz baǵında jetistirilgen “Golden” sortlı almaları jaylastırılmaqta. Bul ónimlerdi qıs hám báhár aylarında xalıqqa jáne ishki bazarlarǵa basqıshpa-basqısh jetkerip beriw rejelestirilgen. Bunday zamanagóy saqlaw infrastrukturasınıń jaratılıwı jetistirilgen ónimlerdi máwsimnen tısqarı dáwirde de sapasın saqlaǵan halda satıw, bazarlarda miywe-ovosh ónimleri támiynatınıń turaqlılıǵın támiyinlewge xızmet etpekte. Maǵlıwmat ornında, Ministrler Kabinetiniń 2026-jıl 28-apreldegi 206-sanlı qararı tiykarında Qaraqalpaqstan Respublikası Suwıtqıshlı sıyımlar associaciyasına aǵza bolǵan subektlerge suwıtqıshlı sıyımlardı qurıw yamasa úskenelew jáne olardan paydalanıwda jumsalǵan elektr energiyası qárejetleriniń bir bólegin qaplaw maqsetinde subsidiyalar ajıratılmaqta. Bul imkaniyattan yuridikalıq tárepler, fermer hám diyxan xojalıqları agroportal arqalı arza beriw jolı menen paydalanıwı múmkin. Sonıń ishinde, suwıtqıshlı sıyımlılıqtı qurıw hám yamasa úskenelew qárejetleriniń 30 procenti, biraq 150 million somnan artıq bolmaǵan muǵdarda, sonday-aq, qıs hám báhár aylarında suwıtqıshlı sıyımlılıqlardan paydalanıw ushın jumsalǵan elektr energiyası qárejetleriniń 50 procentin qaplaw ushın subsidiya ajıratılıwı belgilengen. Bunday jeńillik hám qollap-quwatlaw mexanizmleri aymaqlarda zamanagóy suwıtqıshlı sıyımlılıqlar tarmaǵın keńeytiw, awıl xojalıǵı ónimlerin ısırap etpesten saqlaw hám tutınıwshılarǵa jıl dawamında sapalı ónim jetkerip beriw imkaniyatların jáne de keńeytedi.