Qaraqalpaqstan Respublikasında 2026-jıldıń 9 ayı dawamında awıl xojalıǵı tarawında ámelge asırılǵan jumıslar hám erisilgen nátiyjeler haqqında
Assalawma áleykum, húrmetli ǵalaba xabar qurallarınıń wákilleri, jurnalistler hám brifing qatnasıwshıları!
Búgingi brifingimizde Qaraqalpaqstan Respublikası Awıl xojalıǵı ministrligi tárepinen 2026-jıldıń ótken dáwiri dawamında ámelge asırılǵan jumıslar, awıl xojalıǵı ónimlerin islep shıǵarıw kólemi, paxta hám ǵálle jetistiriw, investiciyalıq joybarlar, jer resurslarınan nátiyjeli paydalanıw hám de xalıqtıń bántligin támiyinlew baǵdarında erisilgen nátiyjeler haqqında maǵlıwmat beremiz.
Bárinen burın, awıl xojalıǵı ónimlerin islep shıǵarıw kórsetkishlerine toqtap ótsek.
2026-jıldıń 9 ayı juwmaqlarına bola, Qaraqalpaqstan Respublikasında awıl, toǵay hám balıq xojalıǵı tarawlarında jámi 18,5 trillion sumlıq ónim islep shıǵarılıp, ósiw páti 103,6 procentti quradı.
Atap aytqanda, 410,3 mıń tonna dán, 312,6 mıń tonna palız-miyweleri (ovosh), 71,9 mıń tonna kartoshka, 153,1 mıń tonna palız ónimleri, 108,8 mıń tonna miywe hám jiydeler jáne 7 mıń tonna júzim jetistirildi.
Sonday-aq, sharwashılıq baǵdarında 71,4 mıń tonna gósh, 235,2 mıń tonna sút hám 285,8 million dana máyek islep shıǵarıldı.
Awıl xojalıǵı eginlerin jaylastırıw baǵdarında bıyılǵı jıldıń zúrááti ushın 314,2 mıń gektar tiykarǵı egislik maydanlarına awıl xojalıǵı eginleri jaylastırıldı. Bunnan tısqarı, 30,1 mıń gektar maydanda tákirarıy eginler egiliwi támiyinlendi.
**Paxtashılıq tarawında da salmaqlı nátiyjelerge erisildi.
*&Bıyılǵı jıldıń ónimi ushın 80 mıń gektar maydanǵa ǵawasha egilip, aymaqlardıń topıraq-ıqlım sharayatına sáykes, suwsızlıqqa hám shorǵa shıdamlı, erte piser hám joqarı ónimli sortlarǵa ayrıqsha itibar qaratıldı.
Sonıń ishinde, 38,3 mıń gektardan aslam maydanǵa sırt el sortları, 36,3 mıń gektarǵa erte piser sortlar, qalǵan maydanlarǵa bolsa keleshegi bar hám jańa sortlar jaylastırıldı.
Ámelge asırılǵan agrotexnikalıq ilajlar nátiyjesinde 392 mıń 171 tonna paxta shiyki zatı terip alındı.
Ǵálleshilik baǵdarında 2026-jıl ónimi ushın jámi 62 mıń gektar maydanda ǵálle jetistirildi.
Máwsim dawamında 2 mıń 43 fermer xojalıǵı tárepinen orım-jıyın jumısları tolıq juwmaqlanıp, 583 mıń 673 tonna ǵálle zúrááti jıynap alındı.
Ortasha ónimdarlıq gektarına 94,1 centnerdi quradı. Ásirese, 905 fermer xojalıǵında ónimdarlıq 100–110 centnerge jetkeni tarawda zamanagóy agrotexnologiyalardan nátiyjeli paydalanılıp atırǵanın kórsetedi.
Investiciyalıq joybarlardı ámelge asırıw baǵdarında da belgili nátiyjelerge erisildi.
Usı jılı ulıwma bahası 73,1 milliard sumlıq 32 investiciyalıq joybar iske qosıldı. Bul joybarlar nátiyjesinde 99 jańa jumıs ornı jaratıldı.
Awıl xojalıǵı jerlerin qayta paydalanıwǵa kirgiziw baǵdarında keń kólemli jumıslar ámelge asırılmaqta.
2026-jılı 8,9 mıń gektar jer maydanın qayta paydalanıwǵa kirgiziw rejelestirilgen bolıp, yanvar–oktyabr aylarında 8 mıń 400 gektar jer maydanı qayta ózlestirildi.
Bul jumıslarǵa басламашыlardıń óz qarjıları esabınan 49,1 milliard sum baǵdarlandı.
Sonday-aq, 53 kilometr suwǵarıw tarmaqları ońlandı, 12 kilometr kollektor tarmaqları jańadan qurıldı hám 6 mıń 392 gektar maydanda agrotexnikalıq ilajlar ámelge asırıldı.
Nátiyjede qayta paydalanıwǵa kirgizilgen jerlerde túrli awıl xojalıǵı eginleri egilip, 2 mıń 802 jańa jumıs ornı jaratıldı.
Xalıqtıń bántligin támiyinlew máselesine ayrıqsha itibar qaratılmaqta.
*&Usı jılı awıl xojalıǵı tarawında 28 mıń jańa jumıs ornın jaratıw rejelestirilgen edi.
Ámelde bolsa yanvar-oktyabr aylarında 43 mıń 608 jumıs ornı jaratılıp, belgilengen reje 155,7 procentke orınlandı.
*&Jaratılǵan jumıs orınları tiyisli elektron platformaǵa kirgizilip, salıq esabatlarında sáwleleniwi támiyinlendi.
Awıl xojalıǵın texnikalıq jaqtan modernizaciyalaw baǵdarında da sezilerli nátiyjelerge erisildi.
Usı jılı 321 milliard sumlıq 661 awıl xojalıǵı texnikasın satıp alıw rejelestirilgen edi.
Búgingi kúnge shekem bolsa 409 milliard sumlıq 1 mıń 529 zamanagóy awıl xojalıǵı texnikası satıp alındı.
*&Bul bolsa texnikalar sanı boyınsha belgilengen rejeniń 231 procentten artıǵıraq orınlanǵanın bildiredi.
Jańa texnikalardıń tartılıwı awıl xojalıǵı jumısların mexanizaciyalaw, agrotexnikalıq ilajlardı óz waqtında orınlaw hám miynet ónimdarlıǵın arttırıwǵa xızmet etpekte.
Húrmetli brifing qatnasıwshıları!
*&Juwmaq ornında aytıw múmkin, 2026-jıldıń ótken dáwirinde Qaraqalpaqstan Respublikası awıl xojalıǵı tarawında islep shıǵarıw kólemin arttırıw, ónimdarlıqtı joqarılatıw, jańa investiciyalıq joybarlardı ámelge asırıw, paydalanıwdan shıqqan jerlerdi qayta ózlestiriw hám xalıqtıń bántligin támiyinlew baǵdarında áhmiyetli nátiyjelerge erisildi.
Keleshekte de awıl xojalıǵına zamanagóy texnologiyalardı keńnen engiziw, jer hám suw resurslarınan aqılǵa uǵras paydalanıw, ónim jetistiriw kólemin arttırıw jáne fermer hám diyqan xojalıqların hár tárepleme qollap-quwatlaw baǵdarındaǵı jumıslar turaqlı dawam ettiriledi.
Itibarıńız ushın raxmet!
