#Diana_Mardana
“Taqırkóldegi” miynet hám tabıstıń shiyrin jemisleri
“Jer ishinde altın bar, qazıb berseń, tabasań. Baǵ ishinde gúmis bar, qaza berseń, tabasań” – bul naqıldıń haqıyqatlıǵın Nókis rayonınıń “Taqırkól” awılında jasawshı Amangúl Allambergenova óziniń “Diana Mardana” fermer xojalıǵın rawajlandırıw arqalı dálillep bermekte.
2005-jılı shańaraqlıq biznes sıpatında shólkemlestirilgen “Diana Mardana” fermer xojalıǵı búgingi kúnde 28 gektar jerge iye. Sonnan 10 gektarı egislik jer bolıp, onıń 5 gektarı ónimdarlı baǵqa, 2 gektarı biydayǵa, 3 gektarı hár túrli palız eginlerine ajıratılǵan. Qosımsha túrde, 3 gektar jerge pilleshilik penen shuǵıllanıwshılarǵa járdem sıpatında tut atızları jaratılǵan.
Amangúl apa shańaraq aǵzaları menen birge erte báhárde paydalanıw ushın eki sotıx jerge ıssıxana shólkemlestirip, kartoshka, piyaz hám hár túrli palız eginlerin jetistiredi. Qazaqstan Respublikasına eksport etiw ushın 1 gektar jerge qawın egilgen.
Shańaraqtıń dáramatın arttırıw maqsetinde, atız shetlerine 1000 túp aq terek hám 500 túp qara tal egilgen bolıp, bul terekler de shańaraqqa jaqsı dáramat keltiredi.
Amangúl apanıń 30 qutı pal hárresi de bar. Ol erte tańnan baslap shańaraq aǵzaları menen birgelikte miynet etip, 15 adamǵa turaqlı jumıs ornın jaratqan. Máwsimde bolsa qosımsha 10-15 adamdı jumıs penen támiynleydi. “Diana Mardana” fermer xojalıǵı – bul miynet súygishlik, shańaraqlıq qádiriyatlar hám tabıstıń ayqın úlgisi.
—-
