Beruniylik pillekeshlerdiń miyneti

Beruniylik pillekeshler usı jılı da “gúmis talshıq” jetistiriwge kiristi. Olar pille jetistiriwdiń sırların iyelep, shańaraq dáramatın arttırıwǵa hám mol zúráát alıwǵa umtılmaqta.

Rayon boyınsha 13 aymaqqa 3212 qutı nawqan qurtı tarqatılıp, 5100 hayal-qızlardıń máwsimlik bántligi támiyinlendi. Rayondaǵı “Tınıshlıq” awıl puqaralar jıyınında bolsa 176 shańaraqqa 450 qutı nawqan qurtı tarqatılıp, olardı tárbiyalaw jumısları dawam etpekte.

Jıl basınan 6-basqısh “Hayallar dápteri”niń 1-basqıshına 261 hayal-qız dizimge alınǵan bolıp, olarǵa nawqan qurtları berildi. Bunnan tısqarı, tut plantaciyalarınan ajıratılǵan jerlerge qıytaq jer ónimleri egilip, shańaraqlarǵa qosımsha dáramat alıp kelinbekte.

Pille tárbiyalawda jası úlken apalar jaslarǵa úlgi bolıp kelmekte. Nawqan qurtlarına azıqtı óz waqtında beriw, bólme temperaturasın kerekli muǵdarda saqlap turıw – bul pille máwsiminde úlken áhmiyetke iye. Nawqan qurtı “gúmis talshıq” orap, zúráát máwsimine kirgenshe pillekeshler tınımsız miynet etedi.

Beruniy rayonı hákiminiń orınbasarı, Shańaraq hám hayal-qızlar bóliminiń baslıǵı S.Kozieva pille jetistirip atırǵan shańaraqlarǵa minnetdarshılıq bildirdi. Olardıń miyneti hám “gúmis talshıq” jetistiriwge qosqan úlesi joqarı bahalanbaqta.