Ǵalaba xabar quralları wákilleri ushın press-tur shólkemlestirild
Búgin Qaraqalpaqstan Respublikası Awıl xojalıǵı ministrligi Baspasóz xızmeti hám Ellikqala rayonı hákimligi Baspasóz xızmeti birgelikte Ellikqala rayonındaǵı “Bostan” klasteri hám “Amirobod jayroni” innovaciyalıq paxta-ǵálle klasterleriniń jumısı menen jaqınnan tanıstırıw maqsetinde ǵalaba xabar quralları wákilleri ushın press-tur shólkemlestirildi
Ilaj dawamında jurnalistler dáslep “Bostan” klasteri JShJnıń paxta tazalaw zavodı hám óndiris procesleri menen tanıstı.
Házirgi waqıtta elimizdiń awıl xojalıǵında jıl dawamında islenip atırǵan miynetlerdiń jemisin kóriw múmkin bolǵan eń juwapkershilikli dáwir – zúráát jıyın-terimi máwsimi ótpekte. Usı múnásibet penen ótkerilgen press-tur dawamında ǴXQ wákilleri rayonnıń ekonomikalıq júregi esaplanǵan “Bostan” klasteri JShJ jumısın hár tárepleme úyrendi.
Ǵawasha paqalınan tayar kiyimge shekem “Bostan” klasteri paxtanı jetistiriwden baslap, onı tazalaw, jip, gezleme hám tayar kiyim-kenshek islep shıǵarıwǵa shekemgi tolıq óndiris shınjırına iye. Jurnalistler klasterdiń talshıq tayarlaw cexları hám zamanagóy tigiw mashinaları menen úskenelengen tigiwshilik fabrikasında bolıp, xalıqqa arnalǵan hár túrli sapalı ónimler islep shıǵarılıp atırǵan processti baqladı.
Jergilikli shiyki zattan básekige shıdamlı, eksportqa jaramlı tayar ónim islep shıǵarılıp atırǵanı ǴXQ wákillerinde úlken tásir qaldırdı.
Media-turdıń gezektegi mánzili “Amirobod jayroni” innovaciyalıq paxta-ǵálle tuqımgershilik klasteri boldı. Jurnalistler bul jerde tuqımgershilik baǵdarındaǵı ilimiy qatnas, sapa qadaǵalaw sisteması hám zamanagóy agrotexnologiyalardıń qollanılıwın úyrendi. Klasterde paxta hám ǵálleshilikte erisilgen joqarı nátiyjeler, innovaciyalardı engiziw boyınsha ámelge asırılıp atırǵan jumıslar ǴXQ wákillerinde úlken qızıǵıwshılıq oyattı.
Bunday press-turlar aymaqta jetistirilip atırǵan ónimlerdiń sapası, awıl xojalıǵındaǵı aldınǵı tájiriybeler hám innovaciyalıq kózqaraslardı keńnen jaqtılandırıw, sonday-aq, fermerlerdiń jetiskenliklerin ǵalaba en jaydırıwda úlken áhmiyetke iye.
