Nókis rayonı tamarqa jer iyeleri kartoshkadan mol zúráát almaqta

Nókis rayonındaǵı miynetkesh tamarqa jer iyeleri bıyıl da kartoshka jetistiriwde úlken jetiskenliklerge erispekte. Atap aytqanda, “Taqırkól” awıl puqaralar jıyını aymaǵındaǵı diyqanlar báhár máwsiminde tamarqa jerlerine kartoshka egip, onı tárbiyalawdıń barlıq agrotexnikalıq talaplarına qatań ámel etti.

Diyqanlar tárepinen waqtında suwǵarıw, sapalı tuqımnan paydalanıw hám zıyankeslerge qarsı gúresiw ilajların nátiyjeli ámelge asırıw nátiyjesinde joqarı zúráátke erisilmekte.

Búgingi kúnde rayonnıń kóplegen tamarqa jer iyeleri 1 gektar maydannan 15 tonnadan aslam kartoshka ónimin alıwǵa erispekte. Bul kórsetkish tek ǵana olardıń miynet súygishligi emes, al aldınǵı agrotexnologiyalardı engiziw nátiyjesi bolıp esaplanadı.

Jergilikli xalıq arasında kartoshka jetistiriwge bolǵan qızıǵıwshılıq artıp atırǵanı, bul bolsa rayonda azıq-awqat qáwipsizligin támiyinlew hám xalıqtıń dáramat dáregin kóbeytiwde úlken áhmiyetke iye bolmaqta.