Ellikqala rayonında Prezident qararınıń orınlanıwı sheńberinde ámeliy seminar ótkerildi
Ellikqala rayonı “Aqshakólshi Reyimbergen” fermer xojalıǵı aymaǵında Prezidentimizdiń 2024-jıl 30-dekabrdegi PQ-465-sanlı qararında belgilengen wazıypalardı orınlawǵa qaratılǵan ámeliy seminar bolıp ótti.
Ilajda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Sh. Teshaev, Qaraqalpaqstan Respublikası Ósimlikler karantini hám qorǵaw agentliginiń baslıǵı R. Sherbaev, taraw qánigeleri hám fermer xojalıqlarınıń basshıları qatnastı.
Seminar dawamında rayonda bar jer resurslarınan nátiyjeli paydalanıw, atız shetleri esabınan qosımsha maydanlardı ózlestiriw, kollektor-drenaj tarmaqları átiraplarınan nátiyjeli paydalanıw, eksportqa baǵdarlanǵan egin túrlerin jaylastırıw, zúráátlilikti arttırıwǵa qaratılǵan agrotexnikalıq ilajlar boyınsha pikir-usınıslar bildirildi. Sonday-aq, háwli jerlerinen aqılǵa muwapıq paydalanıw, xalıqtıń ózin-ózi azıq-awqat ónimleri menen támiyinlewdi kúsheytiw, bos maydanlarda qosımsha ónim alıw máseleleri talqılandı.
Ushırasıw juwmaǵında qatnasıwshılarǵa ámeliy usınıslar berilip, qararda názerde tutılǵan wazıypalardı rayonda basqıshpa-basqısh hám sistemalı ámelge asırıw boyınsha anıq ilajlar belgilendi.
