Xojelide paxta atızlarındaǵı áhmiyetli agrotexnikalıq ilajlar talqılandı Xojeli rayonınıń «Jańa jap» APJ aymaǵındaǵı «Raim dam» fermer xojalıǵında taraw qánigeleri hám fermerlerdiń qatnasıwında ámeliy dala seminarı bolıp ótti. Ilaj ǵawasha tárbiyasınıń tap usı basqıshında orınlanıwı kerek bolǵan jumıslardı belgilep alıw hám de fermerlerge ámeliy usınıslar beriwge qaratıldı. Seminarǵa Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı — awıl xojalıǵı ministri Kamiljan Aytbaev, respublikadan biriktirilgen wákil Abror Raximjanov, Ósimlikler karantini hám qorǵaw agentliginiń wákilleri, awıl xojalıǵı tarawınıń qánigeleri, fermer xojalıqlarınıń basshıları hám de juwapkerli shólkemlerdiń wákilleri qatnastı. Qatnasıwshılar paxta atızlarınıń házirgi jaǵdayın tikkeley atızdıń ózinde úyrenip, mol hám sapalı ónim jetistiriwge tásir etetuǵın faktorlar boyınsha pikir almastı. Hár bir agrotexnikalıq ilajdı belgilengen múddetlerde hám sapalı orınlaw ónimdarlıqtı támiyinlewdiń tiykarǵı shárti ekenligi atap ótildi. Qánigeler tárepinen suwǵarıw tártibin durıs belgilew, ósimliklerdi mineral tóginler menen normalıq azıqlandırıw, qatar aralarına sapalı islew beriw hám suspenziya sebiw boyınsha túsindirmeler berildi. Sonıń menen birge, zıyankesler hám keselliklerdiń tarqalıwın turaqlı baqlap barıw hám de anıqlanǵan jaǵdaylarǵa qarsı ilajlar kóriw zárúrligi aytıp ótildi. Seminar sheńberinde jer resurslarınan aqılǵa muwapıq paydalanıwǵa da itibar qaratıldı. Atap aytqanda, atız shetlerine sáykes eginlerdi jaylastırıw, bos jerlerden ónimli paydalanıw hám sol arqalı fermer xojalıqları ushın qosımsha dáramat dereklerin jaratıw boyınsha usınıslar bildirildi.