Ámiwdárya rayonında silos tayarlaw boyınsha kórgezbe-seminar ótkerildi

Ámiwdárya rayonınıń “Shaykól” APJ aymaǵında awıl xojalıǵında ónimdarlıqtı arttırıw, fermer hám diyqan xojalıqların turaqlı rawajlandırıw jáne ot-jem bazasın bekkemlew maqsetinde silos ónimin tayarlawǵa baǵıshlanǵan kórgizbe-seminar shólkemlestirildi.

Bul ilajǵa Ózbekstan máhálleleri awqamı Qaraqalpaqstan Respublikası basqarmasınıń baslıǵı S. Turmanov, Qaraqalpaqstan Respublikası Ministrler Keńesiniń Awıl xojalıǵı máseleleri boyınsha sekretariatı bas qánigesi M. Berdanov, «Agrostar» JShJ basshısı P. Kudyarov, sonday-aq, Samarqand veterinariya medicinası institutı Nókis filialınıń professor-oqıtıwshıları, aymaqtaǵı fermer hám diyqanlar jáne máhálle puqaralar jıyınlarınıń baslıqları qatnastı.

Seminar dawamında silos ónimin tayarlaw, onı sapalı saqlaw hám qayta islew processlerin nátiyjeli shólkemlestiriw boyınsha ámeliy usınıslar berilip, alǵı tájiriybeler kórsetildi.

Ilaj sońında qatnasıwshılarǵa awıl xojalıǵında nátiyjelilikti jáne de arttırıw, bar resurslardan aqılǵa uǵras paydalanıw hám tarawdı turaqlı rawajlandırıw boyınsha tiyisli usınıslar berildi.