Shor juwmastan shigit egiw boyınsha “Shinjon” texnologiyasınıń ámeliy prezentaciyası ótkerildi
Ózbekstan Respublikası Prezidenti Administraciyasınıń 2025-jıl 16-dekabrdegi 02-PA 1-20546-sanlı tapsırmasına muwapıq, shigitti topıraq shorın juwmastan egiw hámde paxta jetistiriwdiń zamanagóy agrotexnologiyaların tájiriybe-sınaq túrinde engiziw wazıypaları belgilengen.
Usı tapsırmanıń orınlanıwın támiyinlew maqsetinde Kegeyli rayonı “Ishanqala” APJ aymaǵında qıtaylı isbilermenler tárepinen 2026-jıl ónimi ushın 53 gektar jer maydanında shor juwmastan, “Shinjon” texnologiyası tiykarında plyonka astına shlang tósew arqalı shigit egiw jumısları ámelge asırıldı.
Usı múnásibet penen tájiriybe maydanlarında alıp barılıp atırǵan jumıslar menen jaqınnan tanısıw, shor juwılmaǵan maydanlarda shigit egiw texnologiyaların ámeliy jaqtan úyreniw hám aldınǵı tájiriybelerdi keńnen en jaydırıw maqsetinde kórgizbeli-ámeliy seminar shólkemlestirildi.
Seminarǵa rayon hákimleriniń awıl hám suw xojalıǵı máseleleri boyınsha orınbasarları, “Shinjon” texnologiyası tiykarında shigit ekken hám usı texnologiyanı engiziw tilegin bildirgen fermer xojalıqlarınıń basshıları qatnastı.
Ilaj dawamında Ózbekstan Respublikası Awıl xojalıǵı ministrligi janındaǵı Awıl xojalıǵında bilim hám innovaciyalar milliy orayınıń Qaraqalpaqstan Respublikası agroxızmetler orayınıń direktorı B.Annaqulov, Kegeyli rayonınıń hákimi A.Kamalov, sonday-aq, qıtaylı qánigeler hám fermerler tárepinen shor juwmastan shigit egiwdiń abzallıqları, suwdı únemleytuǵın texnologiyalardı qollanıwdıń nátiyjeliligi hám bul tájiriybeniń aymaqtıń klimat sharayatındaǵı nátiyjeliligi boyınsha hár tárepleme maǵlıwmatlar berildi.
Seminar juwmaǵında aldınǵı agrotexnologiyalardı aymaqlarda keńnen engiziw, suw resurslarınan aqılǵa uǵras paydalanıw hám paxtashılıqta ónimdarlıqtı arttırıw boyınsha tiyisli usınıslar bildirildi.
