2025-jıl zúráátin támiyinlewge qaratılǵan seminar

Ámiwdárya rayonınıń “Aq altın” awıl puqaralar jıyınında jaylasqan “Yakupova Gavxar” fermer xojalıǵında 2025-jıl zúrááti ushın shigit egilgen maydanlarda qatar araların islew beriw, tereń jumsartıw, azıqlandırıw hám suspenziya sebiw jumısların shólkemleskenlik penen sistemalı túrde ámelge asırıw boyınsha agrotexnikalıq ilajlarǵa baǵıshlanǵan seminar ótkerildi.

Seminarǵa, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshayev, Qaraqalpaqstan Respublikası Joqarǵı Keńesiniń komitet baslıǵı A.Jumanazarov, Ózagroinspekciyanıń Qaraqalpaqstan Respublikası basqarmasınıń baslıǵı A.Yusupov, rayon hákimi S.Xójametov hám fermer xojalıqlarınıń baslıqları qatnastı.

Seminar dawamında 2025-jıl zúrááti ushın áhmiyetli bolǵan agrotexnikalıq ilajlar, sonıń ishinde, qatar araların islew, tereń jumsartıw, azıqlandırıw hám suspenziya sebiw jumısların nátiyjeli shólkemlestiriw boyınsha pikir alısıwlar júrgizildi. Tájiriybeli qánigeler tárepinen berilgen másláhátler fermerlerge óz xojalıqlarında ónimdarlıqtı arttırıw, sapalı zúráát alıw hám ósimliklerdi keselliklerden qorǵawda úlken járdem beredi.

Sh.Teshayev tárepinen awıl xojalıǵı tarawında mámleket tárepinen qollap-quwatlanıp atırǵan baǵdarlamalar hám imkaniyatlar haqqında maǵlıwmat berildi.

Seminar dawamında fermer xojalıqlarınıń basshıları óz tájiriybeleri menen bólisip, óz xojalıqlarında qollanılatuǵın túrli agrotexnikalıq usıllar hám texnologiyalar haqqında aytıp berdi.