Ámiwdárya rayonında zamanagóy agrotexnologiyalar tiykarında paxta egiw jumısları dawam etpekte
Ámiwdárya rayonı “Arnaboyi” mákan puqaralar jıyını aymaǵında jaylasqan “Ismailov Eldarbek” fermer xojalıǵında paxta egiw jumısları joqarı dárejede hám shólkemleskenlik penen alıp barılmaqta. Bul fermer xojalıǵı tárepinen usı jılı 49 gektar maydanǵa shigit egiw rejelestirilgen bolıp, ámelde bul kórsetkish arttırılıp, 50 gektar maydanda egiw jumısları ámelge asırılmaqta.
Fermer xojalıǵı basshısınıń atap ótiwinshe, egiw procesinde zamanagóy agrotexnologiyalar keńnen engizilgen. Sonıń ishinde, paxta 66×10 sxemasında qos qatar usılında, aldınǵı texnikalar járdeminde egilmekte. Egiw procesinde paydalanılıp atırǵan zamanagóy traktorlar avtopilot sisteması menen úskenelengen bolıp, bul jumıslardıń anıqlıǵı hám nátiyjeliligin arttırıwǵa xızmet etpekte.
Sonday-aq, Túrkiyadan alıp kelingen zamanagóy seyalkalar tuqımdı anıq norma tiykarında, ısırapgershiliksiz egiw imkaniyatın bermekte. Bul bolsa óz gezeginde fermer xojalıǵında waqıttıń únemleniwine, jumısshı kúshi qárejetleriniń azayıwına hám ulıwma nátiyjeliliktiń artıwına unamlı tásir etpekte. Qánigelerdiń pikirinshe, bunday aldınǵı kózqaraslar keleshekte ónimdarlıqtı bunnan bılay da arttırıw hám awıl xojalıǵında nátiyjeli juwmaqlarǵa erisiwde áhmiyetli faktor bolıp xızmet etedi.
