Kóp tarmaqlı fermer xojalıǵı: nátiyjeli jumıs hám jańa baslamalar
Awıl xojalıǵı mámleketimiz ekonomikasınıń áhmietli tarmaqlarınan biri bolıp, búgingi kúnde fermer xojalıqlarında óndiristi diversifikaciyalaw, jer hám suw resurslarınan nátiyjeli paydalanıw, qosımsha dáramat dáreklerin jaratıw hám jańa jumıs orınların shólkemlestiriwge ayrıqsha itibar qaratılmaqta.
Ámiwdárya rayonınıń Babur atındaǵı awılında jumıs alıp barıp atırǵan “Úmit Azimxoja” fermer xojalıǵı mine usınday kóp tarmaqlı xojalıqlardan biri bolıp esaplanadı.
Fermer xojalıǵı óz jumısın 2013-jılı baslaǵan. Búgingi kúnde xojalıq qaramaǵında jámi 168 gektar jer maydanı bolıp, sonnan 79 gektarı egislik maydanları bolıp esaplanadı. Bıyılǵı awıl xojalıǵı jılında 15 gektar maydanda biyday jetistirilgen bolsa, 64 gektar jer maydanına shigit egilgen.
Xojalıq basshısı Umarbek Jumabaev tárepinen óndiristi keńeytiw hám xojalıq jumısın diversifikaciyalawǵa qaratılǵan izbe-iz jumıslar nátiyjesinde fermer xojalıǵında diyqanshılıq penen bir qatarda sharwashılıq, baǵshılıq hám balıqshılıq baǵdarları da jolǵa qoyılǵan.
Atap aytqanda, xojalıqta 80 bas qaramal hám 100 bas qoy baǵılmaqta. Qara mallardıń tiykarǵı bólegin golshteyn hám simmental porodaları qurasa, qoylar gissarı hám arashan porodalarına tiyisli. Bul bolsa násilli sharwashılıqtı rawajlandırıw, gósh hám sút ónimlerin islep shıǵarıw kólemin arttırıw imkaniyatın bermekte.
Sonday-aq, xojalıq aymaǵındaǵı 3 gektar maydanda miyweli baǵ jaratılǵan. 2 gektar maydanda jasalma suw basseynleri shólkemlestirilip, intensiv usılda balıq jetistiriw jumısları alıp barılmaqta.
Fermer xojalıǵı tárepinen awıllıq jerlerde isbilermenlik jumısın rawajlandırıw hám xalıqtıń bántligin támiyinlew maqsetinde tas maydalaw kareri de iske qosılǵan. Bul baǵdar xojalıq ushın qosımsha dáramat dáregi bolıw menen birge, jańa jumıs orınların jaratıwǵa da xızmet etpekte.
Házirgi waqıtta xojalıq jámááti paxtadan joqarı zúráát alıw hám jetistirilgen zúráátti qısqa múddetlerde, sapalı jıynap-terip alıwǵa tayarlıq kórmekte. Onda xojalıq qaramaǵındaǵı zamanagóy paxta teriw mashinasınan nátiyjeli paydalanıw rejelestirilgen.
“Umid Azimxwja” fermer xojalıǵınıń tájiriybesi jerden hám bar imkaniyatlardan aqılǵa uǵras paydalanıw, jumıstı kóp tarmaqlı tiykarda shólkemlestiriw jáne zamanagóy qatnaslardı ámeliyatqa engiziw arqalı awıl xojalıǵında nátiyjelilikti arttırıw múmkin ekenligin kórsetpekte.
