Búgin belgilengen reje tiykarında Kegeyli rayonı hákimligi hám Qaraqalpaqstan Respublikası Awıl xojalıǵı ministrligi baspasóz xızmetleri menen birgelikte respublikalıq ǵalaba xabar quralları wákilleriniń qatnasıwında media-tur shólkemlestirildi.

Media-turdıń dáslepki mánzili Iyshanqala awıl puqaralar jıyını aymaǵında qıtaylı isbilermenler tárepinen Qıtay texnologiyası tiykarında paxta jetistirilip atırǵan atız maydanı boldı. Qatnasıwshılar bul jerde zamanagóy agrotexnologiyalardıń qollanılıwı hám paxtashılıqtaǵı ámeliy processler menen tanıstı.

Bunnan soń media-tur qatnasıwshıları rayondaǵı paxta qabıllaw orınlarına barıp, paxta zúráátin qabıllaw, elektron esapqa alıw hám qadaǵalawda qollanılıp atırǵan zamanagóy “Agrotarozi” elektron sistemasınıń jumısın úyrendi.

Media-turdıń keyingi mánzili awıl xojalıǵında tamshılatıp suwǵarıw sisteması ushın zárúr bolǵan polietilen trubalar islep shıǵarıwshı kárxana boldı. Qıtaylı isbilermen tárepinen shólkemlestirilgen bul kárxananıń jumısı, óndiris processleri hám suwdı únemleytuǵın texnologiyalardı engiziwdegi áhmiyeti haqqında maǵlıwmat berildi.

Sonday-aq, jurnalist hám blogerler rayonda jetistirilip atırǵan másh ónimin eksport etiw menen shuǵıllanıwshı “Global Export” kárxanasınıń jumısı menen de tanıstı. Kárxanada másh ónimlerin qabıllaw, saylap alıw hám eksportqa tayarlaw processleri, sonday-aq, awıl xojalıǵı ónimlerin sırtqı bazarlarǵa jetkerip beriw baǵdarında ámelge asırılıp atırǵan jumıslar haqqında sóz etildi.

Bul media-turdan gózlengen tiykarǵı maqset — rayonda awıl xojalıǵı tarawında ámelge asırılıp atırǵan reformalar, zamanagóy texnologiyalardıń engiziliwi, óndiris hám eksport potencialın keń jámiyetshilikke jetkeriwden ibarat.