Ózbekstan Respublikası Awıl xojalıǵı ministrligi tárepinen Azıq-awqat qáwipsizligi málimleme sisteması islep shıǵılǵan bolıp, bul sistema dáslep tájiriybe-sınaq túrinde Qaraqalpaqstan Respublikası hám Samarqand wálayatında engiziliwi belgilengen. Búgin Qaraqalpaqstan Respublikası Awıl xojalıǵı ministrliginde rayonlardıń azıq-awqat qáwipsizligi boyınsha juwapker qánigeleriniń qatnasıwında videokonferenciya túrinde seminar shólkemlestirildi. Seminarǵa Qaraqalpaqstan Respublikası Awıl xojalıǵı ministriniń azıq-awqat qáwipsizligi hám awıl xojalıǵında ekonomikalıq reformalar máseleleri boyınsha orınbasarı Mahmud Muxanov, Ózbekstan Respublikası Awıl xojalıǵı ministrliginiń Azıq-awqat qáwipsizligi balansı hám bahalar analizi basqarmasınıń baslıǵı Nursultan Kayupov, sonday-aq, rayonlardıń azıq-awqat qáwipsizligi boyınsha juwapker qánigeleri qatnastı. Seminar dawamında qánigelerge jańa málimleme sistemasınan paydalanıw mexanizmi, maǵlıwmatlardı kirgiziw hám qáliplestiriw tártibi tolıq túsindirildi. Bul sistema arqalı rayon juwapker xızmetkerleri monitoring alıp barılatuǵın diyqan bazarların tańlaydı. Bunnan keyin sistema avtomatikalıq túrde azıq-awqat ónimleriniń dizimin qáliplestiredi. Juwapker xızmetkerler bolsa hár kúni ónimlerdiń bahaları boyınsha tiyisli maǵlıwmatlardı sistemaǵa kirgizip baradı. Bahalar monitoringi úsh tiykarǵı baǵdarda ámelge asırıladı: – islep shıǵarıwshı bahası; – kótere sawda bahası; – diyqan bazarındaǵı usaqlap satıw bahası. Eger monitoring procesinde belgili bir ónim bazarda joq bolsa, juwapker xızmetker sistemada “Ónim joq” belgisin, bazar islemey atırǵan jaǵdayda bolsa “Bazar jabıq” belgisin tańlaydı. Bul málimleme sistemasın engiziwden tiykarǵı maqset azıq-awqat ónimleriniń bahaları ústinen sistemalı monitoring alıp barıw, bahalardıń jasalma túrde artıp ketiwiniń aldın alıw, xalıqtı tiykarǵı azıq-awqat ónimleri menen turaqlı támiyinlew jáne ayırım ónimler boyınsha júzege keliwi múmkin bolǵan jetispewshilikti erte anıqlaw hám onıń aldın alıw ilajların kóriwden ibarat. Sonday-aq, sistema arqalı qáliplestiriletuǵın kúnlik maǵlıwmatlar azıq-awqat bazarındaǵı házirgi jaǵdaydı jedel tallaw, bahalar dinamikasın baqlap barıw hám tiyisli ilajlardı óz waqtında belgilew imkaniyatın beredi.