Jerge islew beriw — mol ónimniń áhmiyetli faktorı
«Jerge óz waqtında islew berilse, ónim mol boladı», deydi xalqımız. Haqıyqatında da, awıl xojalıǵında hár bir agrotexnikalıq ilajdı óz múddetinde hám sapalı orınlaw kelesi jıl óniminiń bereketli bolıwında áhmiyetli orın tutadı.
📍 Shomanay rayonı Qarabaylı MPJ aymaǵındaǵı K. Yusupov fermer xojalıǵı atızlarında 2027-jıl ónimi ushın eginlerden bosaǵan jer maydanlarında gúzgi súrgilew jumısların shólkemlestiriw, jer konturların muwapıqlastırıw hám keńeytiw máselelerine baǵıshlanǵan ámeliy-kórgizbeli seminar ótkerildi.
Onda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Kamiljan Aytbaev, Ózagroinspekciyanıń Qaraqalpaqstan Respublikası basqarması baslıǵı Erpolat Qayıpbergenov, Shomanay rayonı hákiminiń awıl hám suw xojalıǵı máseleleri boyınsha orınbasarı, rayonlıq awıl xojalıǵı tarawı qánigeleri hám de fermerler qatnastı.
Seminar dawamında gúzgi shúdigarlaw jumısların belgilengen agrotexnikalıq talaplar tiykarında ámelge asırıw, jerdiń meliorativlik jaǵdayın jaqsılaw, topıraq ónimdarlıǵın saqlaw hám arttırıw, sonday-aq, jer maydanlarınan nátiyjeli paydalanıw máselelerine ayrıqsha itibar qaratıldı.
Qánigeler tárepinen atız sharayatında ámeliy kórsetpeler berilip, fermer xojalıǵı wákillerine kelesi jıl ónimi ushın jerlerdi sapalı tayarlaw boyınsha usınıslar berildi.
