Búgin Nókis rayonı hákimliginiń májilisler zalında Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı – Awıl xojalıǵı ministri Kamiljan Aytbaevtıń qatnasıwında rayon fermer xojalıqları basshıları menen ushırasıw bolıp ótti. Onda Nókis rayonı hákimi Z. Zaytov ta qatnastı. Ushırasıwda jumısında qıyınshılıqlarǵa dus kelip atırǵan, ónimdarlıǵı tómen hám finanslıq minnetlemelerin orınlawda mashqalaları bar fermer xojalıqların qollap-quwatlaw máselelerine ayrıqsha itibar qaratıldı. Atap aytqanda, tájiriybeli hám nátiyjeli jumıs alıp barıp atırǵan fermer xojalıqların ustaz sıpatında biriktiriw, olar arasında «ustaz-shákirt» sistemasın jolǵa qoyıw arqalı mashqalalı xojalıqlardıń jumısın jaqsılaw, ónimdarlıqtı arttırıw jáne bar qarızdarlıqlardı saplastırıwǵa járdemlesiw boyınsha pikir alısıldı. Sonday-aq, fermer xojalıqlarınıń jumısın mánzilli úyreniw hám anıqlanǵan mashqalalardı ornında sheshiw boyınsha tiyisli wazıypalar belgilep alındı.