Xojeli rayonında dala sharayatında biogumus tayarlaw boyınsha ámeliy seminar ótkerildi
Xojeli rayonı «Jańa jap» APJ aymaǵındaǵı «Kiyik mergen» fermer xojalıǵı dala maydanında Agroxızmetler orayı qánigeleri tárepinen biogumus tayarlaw texnologiyasına baǵıshlanǵan ámeliy seminar shólkemlestirildi. Seminar dawamında rayon másláháchisi Sh.Kamalov tárepinen jergilikli tóginler hám ósimlik qaldıqlarınan paydalanǵan halda dala sharayatında biogumus tayarlaw usılları ámeliy tárizde kórsetildi. Ilajdıń tiykarǵı maqseti dalalarda jıynalıp qalatuǵın ósimlik qaldıqların qayta islew, olardan tábiyiy organikalıq tógin alıw hám topıraq ónimdarlıǵın arttırıwǵa qaratılǵan. Atap ótilgenindey, biogumus topıraqtıń quramlıq dúzilisin jaqsılaw, onıń biologiyalıq belsendiligin arttırıw hám awıl xojalıǵı eginleri ónimdarlıǵın kóbeytiwde zárúr áhmiyetke iye. Bunday ámeliy shınıǵıwlar fermer xojalıqları hám tamırqa jer iyeleri arasında ekologiyalıq taza agrotexnologiyalardı keń engiziw, jergilikli resurslardan nátiyjeli paydalanıw hám de organikalıq diyqanshılıqtı rawajlandırıwǵa xızmet etedi. Biogumus tayarlaw texnologiyası boyınsha qosımsha maǵlıwmat alıw niyetinde bolǵan puqaralar rayonlıq Agroxızmetler orayı qánigelerine múrájat etiwi múmkin.

