Awıl xojalıǵı hám sharwashılıqtı rawajlandırıwda áhmiyetli máseleler
Búgin Qanlıkól rayonında Ózbekstan Respublikası Ishki isler ministri orınbasarı S.Nishonboev, Qaraqalpaqstan Respublikası Ministrler Keńesi Baslıǵınıń orınbasarı K.Aytbaev hám rayon hákimi B.Sultanov basshılıǵında awıl xojalıǵı tarawında fermerler menen ushırasıw boldı.
Májilisde Prezidentimizdiń 2025-jıl 31-oktyabrdegi PQ-322-sanlı qararınıń mazmun-mánisi keńnen túsindirildi. Atap ótilgenindey, bul qarar menen awıl xojalıǵı jerlerinen nátiyjeli paydalanıw, sharwashılıqtı rawajlandırıw hám azıq-awqat qáwipsizligin támiyinlew boyınsha jańa tártipler engizilgen.
Atap aytqanda, azıqlıq eginlerin jetistiriw ushın ajıratılǵan jáne paxta-ǵálle hám sharwashılıq baǵdarındaǵı fermer xojalıqlarına jer maydanınıń belgilengen bóleginde jeńil konstrukciyalı sharwashılıq imaratları, suw basseynleri hám azıqlıq saqlaw qoymaxanaların qurıwǵa ruxsat beriliwi, bunıń esabınan sharwa mallarınıń bas sanın arttırıw hám óndiris kólemin keńeytiw talaplarınıń belgilep qoyılǵanı atap ótildi.
Ilajda Prezidentimizdiń PP-82-sanlı Pármanı tiykarında paxta hám biyday jetistiriwshilerdi finanslıq qollap-quwatlaw, tarawǵa jeńilletilgen finanslıq mexanizmlerdi engiziw jáne islep shıǵarıwshılardıń ekonomikalıq turaqlılıǵın támiyinlewge qaratılǵan ilajlar haqqında túsinikler berildi.
Bunnan tısqarı, PP-83-sanlı Párman menen suwǵarılmaytuǵın hám jaylaw jer uchastkalarınan nátiyjeli paydalanıwdı xoshametlew, bos turǵan jerlerdi óndiris procesine tartıw, sharwashılıq hám ot-jem bazasın bekkemlew boyınsha jaratılıp atırǵan imkaniyatlar boyınsha da tolıq maǵlıwmatlar berildi. Májilis juwmaǵında fermer xojalıqlarınıń basshılarına bar imkaniyatlardan nátiyjeli paydalanıw, nızamshılıq talaplarına qatań ámel etiw hám óndiris kólemin jáne de arttırıw boyınsha tiyisli usınıslar berildi. –
