Eksport, qayta islew hám jańa jumıs orınları: Kegeylidegi iri agrojoybar
️Ózbekstan Respublikası Awıl xojalıǵı ministri Ibrohim Abdurahmonov tarawda ámelge asırılıp atırǵan jumıslardıń nátiyjeliligi menen tanısıw maqsetinde házirde Qaraqalpaqstan Respublikasında bolıp turıptı.
️Sapar etiwdiń dáslepki mánzili sıpatında Kegeyli rayonındaǵı “ADM Agro” JShJ jumısı úyrenildi. Ministrge sapar dawamında Qaraqalpaqstan Respublikası Ministrler Keńesiniń Baslıǵı Farxod Ermanov basshılıq etpekte.
️ Házirgi waqıtta kárxana tárepinen 63 gektar maydanda intensiv qáreli baǵı jaratılǵan. Joybar sheńberinde ónimdi jetistiriw, saqlaw, qayta islew hám eksportqa baǵdarlawdı qamtıp alatuǵın kompleksli agroklaster sisteması jolǵa qoyılmaqta. Keleshekte joybar maydanların 300 gektarǵa shekem keńeytiw rejelestirilgen.
➤ Joybardıń áhmiyetli táreplerinen biri – jetistirilgen zúráátti tek ǵana shiyki zat sıpatında satıw emes, al onı tereń qayta islew, qadaqlaw hám joqarı qosımsha qunǵa iye ónimler islep shıǵarıw bolıp tabıladı. Nátiyjede ónimler ishki hám sırtqı bazarlarǵa jetkerip beriledi jáne aymaqta jańa jumıs orınları jaratıladı.
️Egilip atırǵan qáreli sortları ishki hám sırtqı bazarlarda joqarı talapqa iye bolıp, zúrááttiń tiykarǵı bólegi eksportqa baǵdarlanıwı názerde tutılǵan. Bul bolsa aymaqtıń eksport potencialın jáne de arttırıwǵa xızmet etedi.
Óz náwbetinde Ibrohim Abdurahmonov hám Farhod Ermanov baǵshılıqtı ele de rawajlandırıw, eksportqa qolaylı miyweli baǵlar maydanların keńeytiw máselelerin dodaladı. Atap aytqanda, keleshekte bunday intensiv baǵlardı keńeytiw hám respublikamızdıń basqa aymaqlarında da jaratıw imkaniyatları kórip shıǵıldı.
️ Ministr baǵda ámelge asırılıp atırǵan jumıslardı unamlı bahalap, eksportqa qolaylı miywe-ovosh ónimlerin jetistiriw, qayta islew quwatlıqların keńeytiw hám de zamanagóy agrotexnologiyalardı engiziw boyınsha tiyisli usınıslar berdi.
Sonday-aq, bunday joybarlar aymaqta jańa jumıs orınların jaratıw, xalıqtıń bántligin támiyinlew hám eksport kólemlerin arttırıwda úlken áhmiyetke iye ekenin atap ótti.
