Mámleketlik xızmetkerlerdiń xızmet etikası hám ruwxıy-aǵartıwshılıq juwapkershiligine baǵıshlanǵan májilis ótkerildi

Qaraqalpaqstan Respublikası Awıl xojalıǵı ministrliginde Ózbekstan Respublikası Awıl xojalıǵı ministriniń Ruwxıy-aǵartıwshılıq isleri boyınsha keńesgóyi Muzrob Mavlonovtıń qatnasıwında ministrlik apparatı xızmetkerleri hám aymaqlıq bólimlerdiń wákilleri ushın májilis ótkerildi.

Májilistiń tiykarǵı itibarı mámleketlik xızmetkerlerdiń xızmet ádebi, sóylesiw mádeniyatı, jámiettegi júris-turıs qaǵıydalarına ámel etiwi hám puqaralar menen sóylesiw procesinde joqarı kásiplik hám ádep-ikramlılıq normalarına ámel etiwi máselelerine qaratıldı.

Ilaj dawamında mámleketlik xızmetker tek ǵana xızmet wazıypaların emes, al jámiyet aldındaǵı juwapkershiligin de tereń ańlawı, óziniń is-háreketi, qarım-qatnası hám kásiplik mádeniyatı menen mámleketlik xızmetke bolǵan isenimdi bekkemlewi zárúrligi atap ótildi.

Sonday-aq, keleshektegi paxta jıyın-terimi máwsimin joqarı dárejede shólkemlestiriw, máwsim dawamında mámleketlik xızmetkerlerdiń xızmet wazıypaların juwapkershilik penen orınlawı, miynet jámáátleri hám xalıq penen nátiyjeli jáne mádeniyatlı qarım-qatnas júrgiziw boyınsha áhmiyetli wazıypalar belgilep berildi.

Májiliste Qaraqalpaqstan Respublikası Awıl xojalıǵı ministriniń azıq-awqat qáwipsizligi hám awıl xojalıǵında ekonomikalıq reformalar máseleleri boyınsha orınbasarı Maxmud Muxanov, ministrlik apparatı xızmetkerleri qatnastı.

Qaraqalpaqstan Respublikasınıń rayonlarındaǵı awıl xojalıǵı bólimleriniń xızmetkerleri videokonferenciya baylanıs sisteması arqalı májiliste qatnastı.

Ilaj sońında mámleketlik xızmetkerlerdiń xızmet tártibi, ádep-ikramlılıq qaǵıydalarına ámel etiwi hám xalıqqa sapalı xızmet kórsetiw baǵdarındaǵı juwapkershiligin bunnan bılay da arttırıw boyınsha tiyisli usınıslar berildi.