TAZA ATÍZ — ÓNIMDARLÍ TOPÍRAQ HÁM EKOLOGIYALÍQ TURAQLÍLÍQTÍŃ GIREWI

🌾 Qaraqalpaqstan Respublikasınıń Taqıyatas hám Xojeli rayonlarında awıl xojalıǵı jerlerin plastikalıq shıǵındılardan tazalaw, topıraq ónimdarlıǵın saqlaw hám ekologiyalıq turaqlılıqtı támiyinlew máselelerine baǵıshlanǵan ámeliy seminarlar ótkerildi.

🚜 Seminarlar Taqıyatas rayonı Keneges APJ aymaǵındaǵı “Usman ata Mehri” fermer xojalıǵı hám Xojeli rayonı Samankól APJ aymaǵındaǵı “Baxiev Ótkirbek” fermer xojalıǵı atızlarında shólkemlestirildi. Olarda fermer xojalıqlarınıń basshıları hám taraw qánigeleri qatnastı.

🌱 Ilajlar dawamında paxta jetistiriwde paydalanılǵan tamshılatıp suwǵarıw shlangları hám plyonkaların atızlardan tolıq jıynap alıw, plastikalıq shıǵındılardı belgilengen tártipte utilizaciyalaw hám awıl xojalıǵı jerleriniń ekologiyalıq jaǵdayın jaqsılaw máselelerine ayrıqsha itibar qaratıldı.

♻️ Atap ótilgenindey, atızlarda qalıp ketken plastikalıq shıǵındılar uzaq waqıt dawamında shirimey, topıraqtıń tábiyiy qásiyetlerine unamsız tásir kórsetiwi múmkin. Sonlıqtan zúráát jıyın-teriminen keyin paydalanılǵan suwǵarıw shlangları hám plyonkalardı óz waqtında jıynap alıw, olardı qayta islewge baǵdarlaw úlken áhmiyetke iye.

🌾 Sonday-aq, gúzgi ǵálle egiw jumısları juwmaqlanıp atırǵan bir waqıtta egislik maydanlardı taza saqlaw, agrotexnikalıq ilajlardı sapalı ámelge asırıw hám topıraqtıń ónimdarlıǵın saqlaw zárúr ekenligi atap ótildi.

📋 Seminarlar juwmaǵında fermer xojalıqları basshılarına atızlardı plastikalıq shıǵındılardan tazalaw, tamshılatıp suwǵarıw sistemalarınıń paydalanılǵan bóleklerin jıynap alıw hám ekologiyalıq talaplarǵa ámel etiw boyınsha tiyisli usınıslar berildi.

✅ Taza atızlar — ónimdarlı topıraq, ekologiyalıq teńsalmaqlılıq hám awıl xojalıǵı turaqlılıǵınıń áhmiyetli faktorı bolıp esaplanadı.

Qaraqalpaqstan Respublikası Awıl xojalıǵı ministrligi Málimleme xızmeti