JICA WÁKILLERI MENEN BIRGE ISLESIW MÁSELELERI DODALANDÍ
Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı, Awıl xojalıǵı ministri Kamiljan Aytbaev Awıl xojalıǵı ministrliginde JICA (Yaponiya xalıqaralıq birge islesiw agentligi) wákilleri — Yoshiko Ozawa hám Kristina Nikolaevnanı qabılladı.
Ushırasıwda JICA SATREPS BLUE joybarı sheńberinde Aralboyı regionında suw resurslarınan nátiyjeli paydalanıw, duzlanǵan jerlerdiń awıl xojalıǵı potencialın arttırıw, klimat ózgerisine beyimlesiwshi innovaciyalıq agrotexnologiyalardı engiziw máseleleri dodalandı.
Sonday-aq, joybar sheńberinde Qaraqalpaqstan Respublikasında ámelge asırılıwı rejelestirilgen qárejet hám payda analizi (CBA) izertlewlerin shólkemlestiriw, atap aytqanda, Qaraózek hám Nókis rayonlarındaǵı tájiriybe maydanlarında alıp barılatuǵın ilimiy-ámeliy izlenisler boyınsha pikir alısıldı.
Tárepler duzlanǵan jerlerde diyqanshılıq nátiyjeliligin arttırıw, amarant, galofit hám basqa da dástúriy bolmaǵan eginlerdi jetistiriw, sonday-aq gúzgi arpa hám tritikale sortlarınıń ekonomikalıq nátiyjeliligin úyreniw hám de aldınǵı tájiriybelerdi keńnen engiziw boyınsha birge islesiw perspektivaların kórip shıqtı.
Ushırasıw juwmaǵında izertlewlerdi nátiyjeli shólkemlestiriw, aymaqlıq shólkemler hám fermer xojalıqları menen birge islesiwdi jolǵa qoyıw, zárúr maǵlıwmatlardı usınıw hám belgilengen wazıypalardı óz-ara muwapıqlastırıw boyınsha kelisip alındı.
Bul birge islesiw Aralboyı aymaǵında suw hám jer resurslarınan aqılǵa uǵras paydalanıw, awıl xojalıǵında ilimiy qatnas hám innovaciyalıq texnologiyalardı rawajlandırıwǵa xızmet etedi.

